Partia Demokratike ka denoncuar zyrtarisht një tjetër krim zgjedhor të organizuar nga eksponentë të mazhorancës në qarkun e Vlorës. Në një reagim publik, PD ka bërë me dije se janë depozituar dy kallëzime penale pranë Prokurorisë së Rrethit Gjyqësor Vlorë dhe pranë Strukturës së Posaçme Antikorrupsion (SPAK), duke akuzuar zyrtarë lokalë për shpërdorim detyre me qëllim ndikimin në procesin zgjedhor.
“Kallëzimi i parë është bërë nga PD nga dega e saj në Vlorë ku denoncon drejtuesit aktualë të Zyrës Vendore të Arsimit Parauniversitar, për përdorimin e strukturave arsimore për qëllime elektorale, në shkelje të ligjit dhe të neutralitetit institucional.
Ndërsa kallëzimi i dytë është depozituar nga Partia Demokratike në Selenicë dhe ka të bëjë me veprimet e kryetarit të Bashkisë Selenicë, i cili, sipas PD-së, ka shpërdoruar detyrën për të ndikuar në votuesit dhe për të favorizuar një forcë të caktuar politike gjatë fushatës”, u tha në një deklaratë.
PD i bën thirrje organeve të drejtësisë të veprojnë pa vonesë, duke hetuar këto raste me seriozitet dhe duke ndëshkuar të gjithë ata që abuzojnë me detyrën dhe përdorin pushtetin për të deformuar vullnetin e qytetarëve.
Discussion about this post