Partia Demokratike ka denoncuar mbylljen e katër shkollave në qytetin e Elbasanit. Deputetja Flutura Açka, ka reaguar përmes një postimi në Facebook duke thënë se është trishtuar pas lajmit së mbylljes shkollave në fshatin Shmil, Preçaj i poshtëm, Kryezjarrth dhe Gracen.
“Në Elbasan mbyllen shkollat e katër fshatrave, në Universitetin e Elbasanit mbyllen shumë degë studimi E ndoqa me trishtim njoftimin e mbylljes së katër shkollave të fshatrave të Elbasanit: Shmil, Preçaj i poshtëm, Kryezjarrth dhe Gracen. Një pjesë e tyre tani janë foto të muzeve të ronitur a dokumentarëve të dikurshëm”.
Gjithashtu, ajo shton se dhe në universitetin e Elbasanit vitet e fundit u mbyllën 13 degë, ku në degën gjuhë-letërsi janë regjistruar vetëm dy studentë.
“Një fat të përafërt ka edhe Universiteti i Elbasanit, vitet e fundit iu mbyllën 13 degë dhe këtë vit në Degën e Gjuhë e Letërsi Shqipe janë regjistruar vetëm dy studentë, me shpresë se do të vijnë edhe të tjerë. Kësisoj, tre vite më pas, Elbasani i Normales, i cili edukoi shqiptarinë për 100 vite paprerë e në të gjitha viset, do t’i dhurojë Shqipërisë vetëm dy të diplomuar në gjuhë e letërsi, ndoshta ndonjë adhurues i gjuhës a ndonjë shkrimtar i talentuar”.
Deputetja e Elbasanit, shkruan se mbyllja e shkollave “do të kishte qenë një nga temat e bisedës në tentativë që kisha menduar kur i bëra ftesën publike gjatë fushatës, koleges sime, zonjës Evis Kushi, sepse Elbasani na dhemb të dyjave. Çfarë do të bëjmë për ta shpëtuar Elbasanin nga ky mallkim, që po ia fshin historinë e ndritur të edukimit, që pa ia mbyll shkollat e sotme dhe po i shkakton erozionin e së nesërmes. Të paktën tani një gjë e kemi të sigurt: fotot e shkollave të braktisura!”D.L/ Gijotina.com
