Partia Demokratike e vulës ka publikuar kriteret që duhet të plotësojnë kandidatët që duan të garojnë për postin e kreut të kësaj partie. Ndërsa grupimi i PD-së së vulës po shkon drejt një çarjeje për shkak se shumica e deputetëve kundërshtojnë vendimin e mbështetësve të Lulzim Bashës dhe Enkelejd Alibeajt për zgjedhjen e kreut të ri më 29 korrik, këta të fundit dita ditës po shkojnë drejt një procesi, që me shumë gjasa do të atakohet në Gjykatë nga Sekretari i Përgjithshëm Gazment Bardhi.
Në kriteret që janë publikuar tërheqin vëmendje dy pika, që mesa duket grupimi që i ka propozuar, kërkon të mbyllë çdo shteg, që pavarësisht si rrjedhin ngjarjet, të lejojnë një kandidim të mundshëm të ish-Kryeministrit Sali Berisha, i cili drejton Rithemelimin dhe ka pas vetes shumicën e çdo structure të Partisë Demokratike, edhe pse i mungon vula dhe logo.
Në kapitullin “aftësitë e angazhimit politik”, në pikën 3 thuhet se “kandidati për kryetar të mos ketë dëmtuar interesat elektorale të Partisë Demokratike në 3 vitet e fundit”. Dhe me logjikën e përdorur, Berisha, duke qenë se në zgjedhjet e pjesshme të 6 marsit 2022 apo edhe të 14 majit, ka kandiduar me logon e koalicioneve të mbështetura nga parti të tjera, ka dëmtuar interesat e PD.
Ndërkohë pika tjetër që përjashton Berishën është ajo “të mos ketë masa disiplinore në fuqi sipas parashikimeve të Statutit të Partisë Demokratike”. Prej shtatorit të vitit 2021, Berisha është përjashtuar nga grupi parlamentar i PD-së së “vulës” pas shpalljes së tij non gara nga SHBA.
Por mes kritereve që janë publikuar është edhe ai që kandidati duhet të ketë kontribuuar aktivisht në fushatat elektorale të Partisë Demokratike në 3 vitet e fundit. Dhe ky kriter mund të penalizojë Lulzim Bashën, i cili në 14 maj nuk u angazhua në fushatë, madje as në krah të kandidatit që mori përsipër të kandidojë me logon e PD-së për Bashkinë e Tiranës, Ronald Bejko.
Edhe pse në fillimin e fushatës deklaroi publikisht që do të angazhohej në mbështetje të kandidatëve të PD në 14 maj, Basha nuk u shfaq asnjë ditë në fushatë, madje për këtë është pyetur publikisht dhe i është shmangur përgjigjeve.
Gjithsesi ndoshta ky kusht nuk e penalizon ish-kryetarin e PD-së për të rimarrë partinë, përsa kohë procesin po e organizojnë mbështetës të tij, pavarësisht se nga Bardhi gjithë procedura konsiderohet anti-statutore.
Discussion about this post