Partia Demokratike ka përgatitur kallëzimin penal për kryebashkiakun, Erion Veliaj, për shkeljet e rënda ligjore në lidhje me tenderin fiktiv të Rr. ‘Xhon Belushi’ në Njësinë Administrative Nr. 4 në Tiranë.
Deputetja Albana Vokshi deklaroi se projekti sipas studimit që është miratuar nga vetë Bashkia Tiranë do të zgjaste rreth 5 muaj, pra fiks në periudhën e zgjedhjeve në 14 maj.
“Sikurse ju kemi informuar tenderi i shpallur nga bashkia, në datë 19 dhjetor, parashikonte si afat për dorëzimin e dokumentacionit të kompanive të interesuar për këtë tender në datë 9 janar si dhe shpalljen e kompanisë fituese në 22 janar. Projekti sipas studimit që është miratuar nga vetë Bashkia Tiranë do të zgjaste rreth 5 muaj pra fiks në periudhën e zgjedhjeve në 14 maj. Por Erion Veliaj nxiton dhe urdhëroi nisjen e punimeve natën pa tabela, pa projekt pa një plan dhe sigurisht pa standarde, por ajo që është më e rënda në shkelje ligjore. Pra qartazi një tender fiktiv dhe një vjedhje e qartë e taksave të qytetarëve shqiptarë.
Veliaj u detyrua të njoftonte anulimin e tenderit fiktiv, u kap në tentativë vjedhjeje nga kandidati për Bashkinë, Belind Këlliçi. Por nuk ka asnjë gjurmë të anulimit, të asnjë formulari zyrtar. Veliaj ka kryer 2 vepra penale, të mashtrimit, që gjoja ka anuluar tenderin dhe të falsifikimit të dokumenteve zyrtare”, shtoi deputetja.
Një megaskandal është denoncuar nga Partia Demokratike tre ditë më parë. Kandidati i PD për Tiranën, Belind Këlliçi denoncoi aferën e asfaltit elektoral, ku tregoi se një tender fiktiv u shpall nga bashkia më 19 dhjetor 2022. Bëhej fjalë për ndërtimin e rrugës “John Belushi”, për të cilën nisën procedurat e tenderit, do të kushtonte 471 milionë lekë, pa pasur një fitues tenderi.
Një ditë pasi PD denoncoi aferën, bashkia vendosi të anulojë tenderin. Por kryebashkiaku deklaron se anulimi është bërë më herët dhe nuk lidhet me PD. Ai shton se rruga do ndërtohet me paratë e ndërmarrjes. Vijimin e punimeve pa pasur një fitues për tenderin, Veliaj e justifikon me faktin se duke qenë se Ujësjellësi i kishte mbaruar të gjitha procedurat, duhej ndërhyrë dhe nuk mund të lihej në atë mënyrë.
Discussion about this post