Kur Rama i dha Boerit kontratën e planit të përgjithshëm vendor të Tiranës, shumëkush u hutua nga propozimi për një pyll orbital që do të rrethonte Tiranën me mbi 2 milion pemë. Por pakkujt i erdhi në mendje se arsyeja pse Boeri dhe Veliaj po propozonin një pyll orbital ishte se ata donin dorë të lirë për ndërtim brenda qytetit. Për të shpëtuar nga bezdia e ndjeshmërive ambjentaliste të aufiencave perëndimore, Rama dhe Veliaj kishin gjetur një zgjidhje ideale: një shpikje gjuhësore që do t’i impresiononte këta ojf-istë të çakërdisur për aq kohë sa Tirana të vazhdonte procesin e betonimit.
Në fund të fundit, Rama dhe Veliaj nuk do të nxirrnin asnjë lek nga xhepi i tyre (çfarë dallimi ka mes parave të taksave dhe pasurisë së tyre personale!) për të mbjellë pemë. Së pari, si pemë të këtij pylli do të numëroheshin pemët ekzistuese pjesë e oborreve të zonave rurale. Së dyti, mbjellja e pemëve të reja nga banorët do të futej në inventarin e sukseseve të gjelbërta të bashkisë. Së treti, si agjensia më e madhe e marketingut në vend, Bashkia e Tiranës do të joshte sektorin privat të financonin mbjelljen e pemëve (çmimin e cakton bashkia, siç di vetë) në shkëmbim të reklamës që vetë Veliaj do t’u garantonte në të gjitha televizionet.
Kështu, Veliaj nisi të inflacionojë shifrat që vitin e parë të zbatimit të projektit. 135 mijë pemë pretendonte të kishte mbjellë, statistikë që ishte përgënjeshtruar nga mediat investigative shumë kohë përpara se të arrinte deri në këtë pikë (https://exit.al/propaganda-erion-veliaj-dhe-25-mije-pemet-e-tij/).
Këto ditë, në vijim të statistikave të paverifikueshme, Veliaj pretendoi se ka mbjellë në Tiranë rreth 500 mijë pemë. Ajo që dihet me siguri është se Veliaj ka dhënë rreth 6 milion m2 leje ndërtimit në kryeqytet https://www.monitor.al/ndertimi-nuk-ndalet-ne-tirane-siperfaqja-e-lejeve-arrin-tjeter-rekord-ne-vitin-2021-rreth-470-mln-euro/) dhe nëse i besojmë statistikat e tij për pemët, i bie që ai ka mbjellë 1 pemë për çdo 10 m2 leje ndërtimi që ka dhënë që nga dita që ka hyrë në zyrë. Me rregull treshi, kur Veliaj të shpallë përmbushjen e objektivit të 2.2 milion pemëve, duhet të marrim me mend se Tiranës i janë shtuar 22 milion m2 beton.
Megjithatë, është interesante të vërejmë edhe se Veliaj përmend vetëm numrin e pemëve që pretendon se ka mbjellë. Ai nuk zë në gojë asnjëherë sipërfaqen e lejeve të ndërtimit që ka dhënë. Ka pak të ngjarë që ai të jetë i pakënaqur me këtë performancë të industrisë së ndërtimit në kryeqytet.
Nëse u referohemi përgjimeve të prokurorisë italiane të anti-mafias, Ndragheta paguan cash për drejtuesit e Bashkisë së Tiranës 20% të vlerës së tregut të ndërtimit final që në momentin e marrjes së lejes. Nëse kjo është e vërtetë, atëherë Veliaj dhe drejtuesit e tjerë të bashkisë del që kanë mbledhur gjatë këtyre viteve vlerën tregut të rreth 1.2 milion m2 ndërtime. Me një mesatare prej 1000 euro/m2, kjo vlerë arrin rreth 1.2 miliard euro.
Siç kanë vënë re shumë qytetarë të vëmendshëm, sa herë që Veliaj del me një lopatë në dorë dhe një fidan të ri propagandistik, ai me siguri sapo ka firmosur lejen e ndërtimit të një kulle tjetër në qendër të Tiranës. Dhe nuk zhgënjeu as kësaj here. Një kullë e re do të ngrihet përbri teqesë së Dervish Hatixhesë tek ish-gropa e Hajdin Sejdisë. Kulla do të jetë 47 kate, ose 185m e lartë. Nëse doni të dini rekordin e ri të pemëve të mbjella nga Veliaj, duhet të prisni derisa t’i vijë radha një kulle tjetër. Deri atëherë, mbillni sa më shumë pemë sepse kryetari i numëron vetë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post