Nga Denisa Skodi
Ç’ide! Ndërsa i bën ballë acarit, thua se erërat e gjithë botës të mblidhen në duar, si fillim të duhet të gjesh një qese. Për këtë s’kërkohet shumë mund, ka plot.
Më pas, puna e do ta zbrazësh sa më shpejt. Duhet nxituar, para se gishtërinjtë e mpirë të mos i hyjnë në punë as dreqit.
Dashtë Zoti të kesh pak fat e të gjesh një qese që s’qelbet fort erë. E zbras dhe nis ta shqyesh vrap e vrap në shirita të barabartë. I merr dhe në to kalon me shkathtësi dorezat e bidonëve plastikë.
Qëllon që ndonjëri të ketë pasur turshi. Sa të mirë janë turshitë në dimër, ë?
Përshkon edhe dorezat e fundit që të kanë mbetur dhe ja ku mbylle pune. Tani vargje- vargje, e mban tërë atë tufë bidonësh të pistë, fare lehtë
Fantastike kur mendon se ti që po e bën të gjithën këtë, je vetëm 8 vjeç. E quaj Flokëverdhi, e bëj qëllimisht. Dua që sa herë t’ua tregoj të tjerëve të mos thonë se “romët” kështu e kanë. Vizitorët e mitur të koshave, sot s’njohin ngjyrë
E ndesh paraditeve, në një prej lagjeve të kryeqytetit. Orar kur duhet të ishte në shkollë, ndoshta në orën e sporteve apo duke pritur me padurim pushimin e gjatë. Rrethanat e ngrenë çdo mëngjes herët, ia heqin ato pak shtresa që e mbulojnë dhe e shpien te koshat e mbeturinave. Duhet të mbledhë bidonë, sa më shumë të mundet. Vetëm kështu ka sigurinë se në mesditë, buka s’do të mungojë
Ai s’di asgjë rreth “çoç zhvillimit” të Tiranës, nuk ia del të rrëmbeje faqet e para, as të dyta të gazetave, përkundrazi kërcënon çdo fasade. Ai do vetëm njohur, lexuar për të, me shpresën se kushedi, përveç bukës, në pjatë mund t’i shtohet pak mish.
Discussion about this post