Prej disa kohësh Paqësor Buzi kishte rënë në heshtje dhe nuk ishte parë më në “garat” për tenderët, ku gjithmonë synonte prokurimet që kanë vlera të larta. Dhe kush më mirë se miku i tij, Ergys Verdho, mund t’i xhironte një mal me para?!
Drejtori i KESH e ka gostitur me 1.2 miliardë lekë. Bëhet fjalë për tenderin me objekt “Rehabilitimi i tunelit të shkarkimit pranë Digës Zadejë”, me një fond limit në vlerën 126,859,115 lekë të reja pa TVSH ose rreth 1.3 miliardë lekë të vjetra me TVSH.
Shohim se në tender kanë marrë pjesë 5 firma, ku fituese është shpallur G.P.G. COMPANY e Paqsor Buzit.
Kjo firmë ka ofruar 116,507,853 lekë të reja pa TVSH ose rreth 1.4 miliardë lekë përfshirë TVSH. Por nëse krahasojmë këtë shifër me ato të dhëna nga kompanitë e tjera pjesëmarrëse, vëmë re se njëra ka ofruar gati 200 milionë lekë më pak se Buzi, por nuk është marrë parasysh nga Verdho.
Gjithashtu, vlen të theksojmë se vlera e ofruar nga Paqsor Buzi është sa 92% e fondit limit të tenderit, duke shtuar dyshimet se ka patur një marrëveshje të heshtur në këtë tender. Prej disa vitesh Paqësor Buzi njihet për tenderët e majmë që merr nga “Rilindja”.
Por, më parë ai njihej për mashtrimet që ka bërë dhe se është person me precedent penal. Kujtojmë se, në vitin 2019, Paqsor Buzi është arrestuar nga policia si i dyshuar për pjesëmarrje në një skemë të mashtrimit me Tatimin mbi Vlerën e Shtuar.
Ai u arrestua bashkë me disa biznesmenë të tjerë me akuzat e “krijimit të skemave mashtruese me TVSH”, “falsifikimit” dhe “fshehjes së të ardhurave”.
Këta biznesmenë u akuzuan në atë kohë se kishin krijuar një skemë me fatura fiktive shitje-blerjesh mes njëri-tjetrit me qëllim përfitimin e TVSH-së nga shteti.
Në këto kushte, duke parë që tenderi mban “Flamurin e Kuq” sipas vlerësimit të Open Data, si dhe aferat e Verdhos që shtohen, nuk është aspak çudi që këto 1.4 miliardë lekë të firojnë pa arritur të investohen sipas planit. Tunelit do t’i hidhet vetëm një dorë betoni e suvaje. Sepse aq tregohet edhe në kontratë: do të ketë vetëm riparim, të mureve dhe pjesës elektrike, punë që sigurisht mund të bëhej me më pak para. Por Verdho si gjithmonë i bie me top sepse i ka dalë frika edhe nga SPAK-u.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post