Presidenti Ilir Meta ka reaguar menjëherë pas raportit të Fondit Monetar Ndërkombëtar ku përgjysmoheshin pritshmëritë për rritjen ekonomike të Shqipërisë për vitin e ardhshëm.
Meta është shprehur se kjo ulje ekonomike ishte një alarm për vendin dhe shtoi se shkaktari kryesor kishte qenë korrupsioni dhe financimi i investimeve jo produktive nga buxheti i shtetit.
“Një shqetësim serioz dhe një alarm për Qeverinë, Kuvendin dhe të gjithë shoqërinë, parashikimi i errët që bën FMN për rritjen ekonomike të Shqipërisë për këtë vit. Parashikohet një ulje me 2.5 pikë përqindje nga 4.5% që ishin pritshmëritë. Me një nivel rritje prej 2% për këtë vit dhe që mund të rishikohet sërish në rënie në vazhdim, Shqipëria ka rritjen më të ulët në rajon, që mund të degradojë në stanjacion ekonomik.”
Nga ana tjetër, Meta është shprehur se shifrat e rritjes ekonomike janë më të ulëta sesa niveli global për vitin 2022, dhe se sipas tij bllokuesit e rritjes ekonomike janë financimi i investimeve jo produktive nga buxheti në vend.
“Shifrat me ulje të rritjes së pritshme ekonomike me 2.5% janë edhe shumë më poshtë sesa ulja në nivel global për 2022, që pritet të jetë vetëm 0.5 %. Bllokuesit e rritjes ekonomike të vendit janë financimi i investimeve jo produktive nga buxheti, efiçencë e ulët e investimeve për shkak të korrupsionit, që gërryen vlerën e tyre, mos lejimi i investimeve private në energji, monopolizimi i ekonomisë, si dhe pasojat e rritjes galopante të çmimeve”.
Discussion about this post