Ish-kryeministri Sali Berisha nuk është funksionari i parë e as i fundit që është përjashtuar nga radhët e PD. Midis 1992 dhe 2021, kanë qenë 26 deputetë të dalë nga lista e PD, që janë përjashtuar nga Sali Berisha, e tani dhe nga “i biri” i tij politik, Lulzim Basha.
Instituti i Studimeve Politike, në një statistikë me të dhëna paraqet listën e deputetëve të përjashtuar zyrtarisht ndër vite. Në krye të listës është deputeti Gramoz Pashko përjashtuar më 1992, nga Berisha pak muaj pas rotacionit politik, pas deklarimeve të tij kritike në media ndaj linjës zyrtare të PD. Në gusht 1992 u përjashtuan grupi i nocionistëve, në mesin e viteve ’90 u përjashtuan deputetët Kalakula (për një deklaratë politike) dhe Baleta (për qëndrimet politike). Përjashtime në grup pati më 1997 me grupin e 14 deputetëve në premomorien kritike në PD dhe më 2001 me grupin mbështetës të ish kandidatit për kryetar Pollo.
Azem Hajdari u përjashtua më 1997 për shkak të nismave të tij (lëvizja sindikaliste) kritike me qeverinë e PD, por një prej rasteve më të bujshme ishte përjashtimi i deputetit Spartak Ngjela gjatë një debati verbal me kryetarin Berisha. Deputeti Fufi i përjashtuar për votë pro PS dhe refuzim të vendimit politik, dy deputetë u përjashtuan për refuzimin e vendimit për dorëheqje kolektive nga mandati parlamentar dhe së fundi, Berisha përjashtohet (përkohësisht) për shkak të qenies së tij në listën e zezë amerikane.
Raportet periodike të ISP kanë nxjerrë në pah me shqetësim natyrën vertikale të vendimmarrjeve në partitë politike, mungesën e rregullave të brendshme garantuese të integritetit dhe rolin dominues të liderëve në raport me strukturat statutore të partive.
PD nuk përbën përjashtim nga këto praktika kritike, përkundrazi. Asnjë parti nuk garanton demokraci dhe transparencës të brendshme dhe nuk ka struktura etike dhe zgjedhore funksionale e të besueshme, – një tregues kritik për gjendjen e partive dhe një sinjal për nevojën urgjente të reformimit të legjislacionit në partitë politike.
