Pezullimi i Ballukut, Balliu: Kjo ishte goditja e parë, ajo përfundimtare është arrestimi i Belës dhe Ramës

Pas vendimit të Gjykatës Kushtetuese për pezullimin e Belinda Ballukut, Klevis Balliu e konsideron këtë si “goditja e parë serioze ndaj regjimit dhe një fitore e pastër e rezistencës qytetare”.

Ai thekson se masa nuk është dhuratë e pushtetit, por rezultat i presionit popullor, denoncimeve mediatike dhe guximit të gazetarëve.

Balliu nënvizon se Lubi Balluku është vetëm një vegël e shefit të korrupsionit, Edi Rama, dhe se misioni i opozitës dhe qytetarëve përfundon vetëm me rrëzimin e plotë të sistemit, arrestimin e Ramës dhe Ballukut, konfiskimin e pasurive të vjedhura dhe çmontimin e “narkoshtetit”.

Ai kërkon dorëheqjen e menjëhershme të kryeministrit dhe krijimin e një qeverie teknike për të rikthyer ligjin dhe dinjitetin e shtetit.

Reagimi

Pezullimi i Lubisë është goditja e parë serioze ndaj regjimit dhe një fitore e pastër e rezistencës qytetare. Kjo nuk është rastësi dhe as dhuratë e pushtetit, por rezultat i drejtpërdrejtë i presionit popullor, denoncimeve të pandërprera të mediave dhe guximit të gazetarëve që nuk u përkulën.

Kallëzimi i Partisë Demokratike e vuri çështjen në shina ligjore, por hetimi u sabotua dhe u zvarrit qëllimisht nga segmente të kapura të drejtësisë. Vetëm përballë betejës politike të opozitës dhe shpërthimit të revoltës qytetare në protestat e fundit kombëtare, pushteti u detyrua të tërhiqet dhe të braktisë mbrojtjen e Lubisë.

Por askush të mos mashtrohet: Lubi Balluku nuk është as fillimi dhe as fundi. Ajo është vetëm një vegël e shefit të korrupsionit, Edi Rama. Kjo rezistencë nuk mbyllet me një pezullim formal, por vetëm me rrëzimin e plotë të sistemit të grabitjes.

Misioni ynë përfundon vetëm me arrestimin e Rama-Ballukut, konfiskimin e pasurive të vjedhura dhe çmontimin e narkoshtetit.

Sot u dha përgjigjja për të gjithë ata që pyesnin çfarë sjellin protestat: protestat detyrojnë pushtetin të lëkundet, të dorëzohet dhe të tërhiqet.

Edi Rama duhet të japë dorëheqjen menjëherë. Shqipëria duhet të shkojë drejt një qeverie teknike, për të shpëtuar vendin nga kthetrat e regjimit Rama-Lubi dhe për t’i kthyer shtetit ligjin dhe dinjitetin.