Real Madridi është ëndërr për futbollistët, sipas Rafaela Pimentas. Për ata që nuk e kanë idenë, Pimenta është agjentja e futbollistit norvegjez të Manchester City, Erling Braut Håland.
Håland, 22 vjeç, ka gëzuar një fillim shumë frytdhënës me “Citizens”, duke shënuar 27 gola në Premier League në sezonin e tij debutues, pas transferimit nga Borussia Dortmundi në verë.
Por në të kaluarën trajneri i tij Pep Guardiola ishte detyruar t’i mohonte lajmet e mediave se kontrata e sulmuesit të tij përmbante një klauzolë lirimi që ai t’i bashkohej Real Madridit në 2024.
“E kemi fokusin në Premier League, pastaj vjen Real Madridi. Ata kanë diçka speciale e cila është edhe ëndërr për lojtarët”, u shpreh Pimenta.
“Madridi po e vazhdon magjinë. Ata nuk i kanë objektiv ndeshjet në kampionat, ata e kanë synimin në UEFA Champions League”, shtoi ajo.
Gjiganti spanjoll e ka fituar trofeun e madh europian, pesë herë që prej vitit 2014 (14 herë në total) me titullin e fundit që erdhi dhe falë fitores në gjysmëfinale ndaj Manchester City.
Avokatja braziliane Pimenta ishte partnere në biznes me super menaxherin italian Mino Raiola dhe e mori përsipër udhëheqjen e agjencisë menjëherë pas vdekjes së tij në prill të vitit të kaluar.
Duke folur në një samit të futbollit në Londër, ajo tha se sulmuesi norvegjez Erling Håland kishte kërkuar t’i bashkohej Cityt në mënyrë që të punonte me Guardiolën, për shkak se Kampionatin Anglez e shihte si tërheqës dhe për faktin se babai i tij Alfie kishte luajtur për Cityn.
Pimenta shtoi se ajo dhe lojtarët e saj gjithmonë përpiqen ta bëjnë një plan se si duan që karriera e lojtarit të shkojë.
“Ne duhet ta bëjmë një plan, ne duhet ta kemi një synim. Mbase nuk e përmbushim, por nëse nuk e dimë se ku po shkojmë, atëherë natyrisht se nuk do të arrijmë atje”, theksoi ajo.
Discussion about this post