Komisioni i Rithemelimit ka reaguar pas prezantimit të platformës së Enkelejd Alibeajt për Presidentin e ri të vendit. Anëtari i Komisionit të Rithemelimit, Enno Bozdo, ka thënë në një reagim në rrjete sociale se nuk mund të ketë propozime për këtë çështje të asnjë deputeti të veçantë në emër të PD.
Sipas Bozdos këtë tagër e ka vetëm Këshilli Kombëtar i PD, ndërsa e cilëson si skenar të turpshëm që synon të kapë opozitën për tu përdorur nga mazhoranca.
“Dokumenti i shpërndarë dje në “emër të grupit parlamentar të PD”, nuk është gjë tjetër veçse disa kritere të Ramës, të vendosura në gojën e atyre që jo vetëm nuk përfaqësojnë PD, por që kërkojnë që kështu zgjedhjen e presidentit t’ia lënë më dorë totalisht Ramës! Rama nga ana e tij do deklarojë që zgjedhje ishte “konsensuale” me opozitën! Një skenar i turpshëm dhe bajat. Është një skenar i tillë sepse synon një opozitë vasale, të kapur, të papërgjegjshme, në kundërshtim me interesat e shqiptarëve! Kjo kohë ka mbaruar! PD sot përfaqëson rezistencën politike dhe qytetare ndaj qeverisjes më të korruptuar në Evropë! Si e tillë ajo do të mbrojë vetëm interesat e Shqipërisë dhe shqiptarëve, dhe jo të Ramës dhe të shiturve tek ai”, shkruan Bozdo.
Discussion about this post