Protesta para Kuvendit/ Policia tërheq zvarrë Arben Kolën, një nga organizatorët e protestës

Policia ka shoqëruar disa qytetarë gjatë protestës së zhvilluar pranë Parlamentit.

Siç shihet edhe në këto pamje, disa protestues shihen të shtrirë në tokë nga forcat e rendit.

Ende nuk ka një njoftim zyrtar nga autoritetet lidhur me numrin e personave të shoqëruar.

Mes të shoqëruarve është edhe njëri nga anëtarët e grupit organizator të protestës, Arben Kola.

Kola është kapur nga 4 policë që e mbajnë nga krahët e këmbët, kurse Kola ka ende megafonin në dorë.

Shoqërimi i tyre erdhi pasi protestuesit, për shkak të bllokadës së vendosur nga Policia e Shtetit përpara Parlamentit, kanë ndryshuar itinerarin e tubimit, duke marshuar fillimisht në Bulevardin “Dëshmorët e Kombit” dhe më pas drejt Unazës së Madhe.

Protestuesit janë pozicionuar pranë kryqëzimit të Rrugës së Elbasanit, ku kanë ndodhur edhe shoqërimet e para nga policia gjatë protestës së sotme.

Ndërkohë, protesta vijon në zonë, ndërsa forca të shumta policore janë të angazhuara për menaxhimin e situatës.Për protestën e sotme janë të angazhuara mbi 1500 forca policore, që kanë formuar kordonë në të gjithë zonën përreth Parlamentit.