Policia e Shtetit ka ngritur alarmin për shtimin e tentativave të mashtrimit që synojnë marrjen e kontrollit të llogarive WhatsApp përmes mesazheve dhe linkeve të rreme që po qarkullojnë në internet.
Sipas autoriteteve, mashtruesit u dërgojnë përdoruesve mesazhe me pretekste të ndryshme, si ftesa për të votuar në një konkurs apo për të konfirmuar një veprim. Pasi viktima klikon mbi linkun, i kërkohet të vendosë kodin 6-shifror të verifikimit të WhatsApp.
Policia sqaron se ky kod përdoret nga autorët për të regjistruar llogarinë në një pajisje tjetër, duke u mundësuar atyre marrjen e kontrollit të saj.
Për të shmangur rënien pre e këtyre skemave mashtruese, Policia e Shtetit u bën thirrje qytetarëve të mos hapin linke të dyshimta, edhe kur ato dërgohen nga kontakte të njohura, si dhe të mos ndajnë në asnjë rast kodin e verifikimit të WhatsApp.
Njëkohësisht, autoritetet rekomandojnë aktivizimin e funksionit “Two-Step Verification” (verifikimi me dy hapa), si një masë shtesë sigurie që ndihmon në mbrojtjen e llogarisë nga akseset e paautorizuara.
“Policia e Shtetit apelon për kujdes ndaj tentativave për marrjen e aksesit në llogaritë WhatsApp.
Policia e Shtetit informon qytetarët se janë konstatuar raste të qarkullimit të mesazheve dhe lidhjeve (linkeve) mashtruese, të cilat synojnë marrjen e kontrollit të llogarive WhatsApp.
Mashtruesit dërgojnë linke me pretendime të ndryshme, si p.sh. për të votuar në një konkurs ose për të konfirmuar një veprim.
Më pas, i kërkohet përdoruesit të vendosë kodin 6-shifror të verifikimit të WhatsApp. Ky kod përdoret nga autorët për të regjistruar llogarinë në një pajisje tjetër dhe për të marrë kontrollin e saj.
Policia e Shtetit këshillon qytetarët:
* Mos klikoni në linke të dyshimta, edhe nëse dërgohen nga persona të njohur;
* Mos ndani kurrë kodin e verifikimit të WhatsApp me askënd;
* Aktivizoni funksionin Two-Step Verification (Verifikimi me dy hapa) në aplikacionin WhatsApp;
* Nëse dyshoni se llogaria juaj është komprometuar, veproni menjëherë për ta rikuperuar atë dhe njoftoni personat e kontakteve tuaja.
Mbroni të dhënat tuaja! Kujdesi juaj është mbrojtja më e mirë ndaj mashtrimeve kibernetike.”, njofton policia.
Discussion about this post