Një incident ka ndodhur ditën e sotme në Kosovë, ku në tentativë për të fshehur kontrabandën e cigareve, një automjet ka goditur makinën e policisë, duke lënë të lënduar një efektiv.
Policia e Kosovës ka dhënë detaje mbi rastin e ndodhur në fshatin Smirë të Vitisë, ku një polic u lëndua gjatë parandalimit të një rasti të kontrabandimit të mallrave.
Policia njofton se në bashkëpunim me Doganën e Kosovës si rezultat i kryerjes së detyrave dhe autorizimeve zyrtare kanë arritur që të identifikojnë dhe parandalojnë kryerjen e një rasti të kontrabandimit të mallrave nga tre persona të dyshuar të përfshirë në rast.
“Me datë 14.01.2024 në fshatin Smirë komuna e Vitisë, policia kufitare ka identifikuar një automjet të dyshuar me targa vendore të cilën ishte duke e drejtuar i dyshuari mashkull kosovar, i cili njëherësh ishte duke përcjellur automjetin e dytë të dyshuar, të ngarkuar me mall të kontrabanduar, në të cilën ndodheshin edhe dy të dyshuarit tjerë meshkuj kosovarë”, thuhet në njoftim.
Më tej, në deklaratë thuhet se pas përpjekjes së zyrtarëve policor për ta ndaluar veturën e dytë të dyshuar, e njëjta duke i rrezikuar seriozisht zyrtarët policorë dhe doganorë ka goditur veturën zyrtare. Zyrtarët policorë gjatë legjitimimit të të dyshuarve, janë kanosur nga njëri prej tyre, dhe gjatë futjes në kontroll të një personi të dyshuar, një zyrtar policor ishte sulmuar, dhe ka pësuar lëndime trupore për të cilat i njëjti po merr trajtim mjekësor.
Gjatë kontrollit të automjetit të dyshuar, të ngarkuar me mallra të kontrabanduara, janë hasur sasi prej 1299 paketime (boksa) të tri llojeve të ndryshme cigaresh, në sasi të përgjithshme rreth 260.000 cigare”, theksohet në njoftim.
Lidhur me rastin janë kontrolluar edhe shtëpitë e banimit të njërit nga të dyshuarit por nuk është gjetur asgjë e dyshuar, ndërsa automjeti i dyshuar i lartcekur dhe malli i ngarkuar janë konfiskuar për t’ju nënshtruar procedurave të mëtejme në terminalin doganor Dheu i Bardhë.
Për të gjitha veprimet e ndërmarra nga Policia e Kosovës, është njoftuar prokuroria kompetente ku me urdhër të prokurorit përkatës dy persona të dyshuar janë ndaluar për 48 orë, ndërsa i dyshuari i tretë, identiteti i të cilit është i njohur për PK-në ndodhet në kërkim policor.
Discussion about this post