Policia e Tiranës ka proceduar penalisht dhe i ka referuar materialet në SPAK edhe për 7 deputetë të Partisë Demokratike në lidhje me tensionet e shkaktuara ditën e djeshme në Kuvend.
Bëhet fjalë për deputetët Elda Hoti, Flamur Noka, Bledjon Nallbati, Gazment Bardhi, Dashnor Sula, Luan Baçi dhe Saimir Korreshi.
Organizata e uniformave blu është bërë qesharake për veprat penale të cilat i ka “bashkëngjitur” deputetes Hoti. Ajo hodhi në sallë një lëndë të lëngshme, për të cilën Spiropali doli që në sekondë të parë në konkluzionin se ishte benzinë dhe ministri i Brendshëm, Ervin Hoxha u hodh direkt në sulm se do e çonte në Prokurori për zjarrvënie të qëllimshme.
Por, pasi e morën vesh se nuk ishte benzinë, por thjesht aromatizues, tashmë Policia e Ramës e akuzon deputeten Elda Hoti për veprat penale “Kanosja” dhe “Shkelja e rregullave mbi lëndët helmuese”. Nuk dihet se në çfarë provash i bazojnë uniformat blu ngritjen e këtyre dy akuzave.
Ndërkohë, deputetët e tjerë janë proceduar penalisht për veprën penale “Kundërshtimi i punonjësit të policisë së rendit publik”.
Njoftimi:
Drejtoria Vendore e Policisë Tiranë në lidhje me tubimin e zhvilluar ditën e djeshme, në vijim të veprimeve hetimore të kryera ka referuar materialet në Prokurorinë e Posaçme Kundër Korrupsionit dhe Krimit të Organizuar në gjendje të lirë për shtetasit:
– E. H., 32 vjeçe, për veprën penale “Kanosja” dhe “Shkelja e rregullave mbi lëndët helmuese”;
– F. N., 53 vjeç, B. N., 38 vjeç, G. B., 39 vjeç, D. S., 55 vjeç, L. B., 61 vjeç, dhe S. K., 43 vjeç, për veprën penale “Kundërshtimi i punonjësit të policisë së rendit publik”.
Ditën e djeshme, në ambientet e sallës së seancave plenare të Kuvendit të Shqipërisë, shtetasja E. H., ka hedhur në drejtim të deputetëve një lëndë të lëngshme të paidentifikuar, ndërsa në hyrje të godinës së Kuvendit të Shqipërisë, shtetasit F. N., B. N., G. B., D. S., L. B., dhe S. K., kanë kundërshtuar me dhunë punonjësit e policisë të planëzuar me shërbim.
Materialet i kaluan Prokurorisë.
Discussion about this post