Plagosje me armë zjarri në Shkozë, qëllohet një efektiv policie jashtë shërbimit (Emri)

Një efektiv policie jashtë shërbimit ka mbetur i plagosur me armë zjarri pak pas mesnatës në zonën e Shkozës, në Tiranë.

Sipas njoftimit paraprak të policisë, ngjarja ka ndodhur rreth orës 00:10, ku në rrethana ende të paqarta është plagosur shtetasi me iniciale Anxhelo Kumaraku, rreth 30-vjeç, efektiv policie në Komisariatin nr.4.

I plagosuri është transportuar menjëherë në spital dhe ndodhet jashtë rrezikut për jetën.

Menjëherë pas ngjarjes, shërbimet e policisë kanë ngritur pika kontrolli dhe po vijojnë kontrollet intensive në zonë me qëllim identifikimin dhe kapjen e autorit ose autorëve.

Në vendngjarje ndodhen grupi hetimor dhe Agjencia e Mbikëqyrjes Policore (AMP), të cilët, nën drejtimin e Prokurorisë, po punojnë për zbardhjen e plotë të rrethanave të plagosjes.

Sipas raportimeve, polici është qëlluar me armë zjarri në këmbë, ndërsa në momentin e ngjarjes ndodhej pranë banesës së tij, i shoqëruar nga një komshi i tij.

Mësohet se komshiu në fjalë ishte nën masën e sigurisë “arrest shtëpie” për armëmbajtje pa leje, por dyshohet se kishte thyer vendimin e gjykatës duke dalë nga banesa.

Hetimet paraprake tregojnë se objektiv i atentatit dyshohet të ketë qenë pikërisht komshiu i efektivit, për shkak të konflikteve të mundshme që lidhen me pazare droge.

Ndërkohë, mbetet ende e paqartë arsyeja pse efektivi Kumaraku shoqëronte një person që ndodhej në “arrest shtëpie”, si edhe pse nuk kishte njoftuar policinë për shkeljen e masës së sigurisë nga ana e tij.

Njoftimi i policisë:

Më datë 18.05.2026, rreth orës 00:10, në zonën e Shkozës, në rrethana ende të paqarta, është plagosur, dyshohet me armë zjarri, shtetasi A. K., rreth 30 vjeç, punonjës policie jashtë shërbimit. 30-vjeçari është transportuar në spital dhe ndodhet jashtë rrezikut për jetën.

Menjëherë pas marrjes së njoftimit, shërbimet e Policisë kanë ngritur pika kontrolli dhe po vijojnë kontrollet intensive në zonë, me qëllim kapjen e autorit/ëve.

Grupi hetimor dhe Agjencia e Mbikëqyrjes Policore (AMP), nën drejtimin e Prokurorisë, ndodhen në vendngjarje dhe po punojnë për sqarimin e plotë të rrethanave, identifikimin e autorit/ëve dhe dokumentimin ligjor të ngjarjes.