I dënuari me burgim të përjetshëm, Admir Tafili ka mbajtur kontaktet me botën jashtë qelisë, pavarësisht se ndodhet brenda katër mureve.
Nga një sinjalizim i SPAK, mësohet se Tafili e kishte shndërruar modemin për kanalet që kapte stacionet televizive, në një pajisje për të bërë video call dhe telefonata me jashtë.
Kontrolli në qeli është bërë pas sinjalizimit të SPAK, pas një dëshmie të dhënë nga Tafili. Ndërkohë, burimet janë të rezervuara, por bisedat dhe telefonatat që ka kryer Tafili me të tjerë janë përgjuar.
Edhe më herët, gjatë kontrolleve blic që ka kryer policia në burg, Tafili bashkë me të dënuar të tjerë është kapur duke përdorur telefon në qeli.
Admir Tafilaj është dënuar për vrasjen e mbetur në tentativë ndaj ish-shefit të Krimeve, Prel Pjetrushi. Ai njihet edhe si kreu i grupit të ‘tritolit’ pasi teksa ndodhej në burg porositi vrasjen e Ibrahim Manit përmes Kristi Pinës, një bashkëpunëtor tashmë i drejtësisë.
Në vitin 2010, Admir Tafili, mori leje nga burgu i Shën Kollit për të parë të ëmën e sëmurë dhe në këtë rast arratiset. Në mars të vitit 2011, vrau në pritë dy vëllezërit e Prel Pjetrushit në fshatin Grudë të Shkodrës. Muaj më vonë, pas një operacioni të suksesshëm policie Tafili arrestohet në Tiranë, për të transferuar më pas në burgun e Burrelit.
Discussion about this post