Bledi Çuçi dhe Arben Ahmetaj janë dy më të goditurit në 24 orët e fundit në rradhët e socialistëve me bekimin ose me dijeninë e Kryeministrit Edi Rama.
Çuçi u shkarkua si ministër i Brendshëm me firmë të Kryeministrit, pas dhunës që të afërm të deputetit Rrahman Rraja ushtruan ndaj dy qytetarëve, pjesëtarë të fisit Maja, në Borizanë të Krujës.
Disa orë pasi Edi Rama përfundoi një tur takimesh në Ballkan me homologë të tij dhe pas “shlodhjes” në Tiranë, në orët e pasdites së të shtunës vendosi shkarkimin e Çuçit dhe emërimin e Taulant Ballës si ministër i Brendshëm.
Dhe pa u shuar jehona e asaj që kishte ndodhur në Borizanë dhe më pas lëvizjet e Ramës për të mbyllur sa më shpejt debatin mbi “dorë“imin e shtetit” përballë pjesëtarëve të Rrajave, SPAK depozitoi në Kuvend kërkesën për arrestimin e Arben Ahmetajt.
Kërkesa e depozituar u pasua nga një mbledhje e Grupit Parlamentar socialist, ku u vendos që PS të mos ishte mburojë e askujt, pra u dha sinjali se kërkesa e SPAK do të miratohej.
Çuçi dhe Ahmetaj kanë pasur një rrugëtim të ndryshëm në rradhët e socialistëve. Megjithatë kanë një të përbashkët: në dy palë zgjedhje të ndryshme ato kanë kryesuar listën e socialistëve në qarkun e Gjirokastrës.
Ahmetaj kryesoi listën në zgjedhjet e 2013-ës, pjesë e së cilës ishte edhe Erion Veliaj, nga ku mund të thuhet se nisi edhe ngjitjen në karrierë mes socialistëve. Ahmetaj në 2013 i siguroi PS-së 4 mandate në Gjirokastër nga 5 të mundshmet.
Ndërkohë në 2017-ën, lista e PS-së në Gjirokastër kryesohej nga Bledi Çuçi. Ky i fundit si drejtues i listës arriti të sigurojë 3 mandate.
Të dy zyrtarët, njëri i shkarkuar dhe tjetri në prag arrestimi, nëse Kuvendi autorizon SPAK, njiheshin në rradhët e PS-së si “klani gjirokastrit”, edhe pse në zgjedhjet që pasuan më vonë ato u vendosën në qarqe të tjera, njëri në Vlorë e tjetri në Berat, si drejtues të strukturave.
Nuk dihet nëse është një rastësi ose jo, por fakt është se si Çuçi dhe Ahmetaj, u goditën brenda një 24 orëshi, i pari nga Edi Rama duke e shkarkuar si ministër, dhe tjetri nga SPAK, ndoshta me dijeninë e Kryeministrit.
Discussion about this post