Presidentja e Kosovës Vjosa Osmani ka reaguar për situatën e krijuar pas vendosjes së reciprocitetit duke ndaluar makinat me targa serbe në vend.
Përmes një postimi në rrjete sociale, ajo shkruan se Serbia ka vepruar në mënyrë të njëanshme prej disa vitesh dhe ka shkelur marrëveshjet e Brukselit.
“Kosova sot ka zbatuar në plotëni marrëveshjet e nënshkruara në Bruksel, të cilat Serbia i ka injoruar dhe po vazhdon të mos i zbatojë. Reciprociteti në çështjen e targave, për të cilën kanë nënshkruar të dyja palët në Bruksel, nuk mund të shihet si veprim tensionues e i njëanshëm, por veprim drejt zbatimit të marrëveshjeve të cilën do të duhej ta kërkonte edhe vet BE-ja. Serbia është ajo që ka vepruar në mënyrë të njëanshme nga viti 2016 e në shkelje të marrëveshjeve të Brukselit, e jo Kosova” – ka shkruar Osmani.
Një thirrje, Osmani e ka për Bashkimin Europian që të ushtrojë presion mbi Serbinë të ndalojë provokimet ndaj Kosovë dhe keqpërdorimin për qëllime politike.
“Prandaj, ftoj Bashkimin Evropian që të ushtrojë presion mbi qeverinë e Serbisë që të ndalojë menjëherë provokimet ndaj Kosovës dhe keqpërdorimin për qëllime politike të qytetarëve serbë të Kosovës. Politika destabilizuese e Serbisë në Kosovë dhe në rajon dhe qëllimet e tyre hegjemoniste për të ashtuquajturën ‘botë serbe’ janë rikthim në logjikën e tyre të viteve ’90, e cila ka sjellë shumë viktima në rajonin tonë” – shkruan më tej presidentja Osmani.
Përfundimi i marrëveshjes së reciprocitetit për targat mes Kosovës dhe Serbisë, ka sjell reagime të forta gjatë ditës së sotme, ku nuk kanë munguar edhe kërcënimet nga aktorët politik e të dyja shteteve.
