Një gjykatë në Kajro ka dënuar me vdekje me varje prezantuesen televizive egjiptiane Sarah Khalifa dhe 11 persona të tjerë, në një çështje të lidhur me prodhimin dhe trafikimin e lëndëve narkotike.
Khalifa, 39 vjeç, njihet për programin televiziv “Mission Impossible”, i cili trajtonte çështje të sigurisë dhe krimit. Vendimi mund të apelohet.
Sipas të dhënave të bëra publike nga mediat shtetërore egjiptiane, Khalifa dhe personat e tjerë u shpallën fajtorë për krijimin e një grupi të organizuar kriminal që siguronte materiale të përdorura për prodhimin e drogave sintetike, me qëllim trafikimin e tyre.
Hetimi lidhet me importimin nga jashtë të lëndëve të para dhe prodhimin e drogave në Egjipt.
Autoritetet kanë sekuestruar më shumë se 750 kilogramë lëndë narkotike dhe materiale të përdorura për prodhimin e tyre.
Në kuadër të operacionit janë zbuluar edhe dy apartamente që dyshohet se ishin përshtatur si laboratorë, ndërsa janë gjetur armë zjarri dhe municione të mbajtura pa leje.
Gjatë procesit gjyqësor, Sarah Khalifa ka mohuar akuzat ndaj saj. Sipas raportimeve, ajo ka thënë se nuk kishte parë drogë deri në momentin kur u fotografua me lëndët narkotike në ambientet e autoritetit kundër narkotikëve.
Gjykata e shpalli fajtore bashkë me 11 të pandehurit e tjerë dhe vendosi dënimin kapital. Para shpalljes së vendimit, çështja kaloi edhe për konsultim te Myftiu i Madh i Egjiptit, një procedurë që kërkohet në rastet kur gjykata jep dënim me vdekje.
Vendimi nuk është ende përfundimtar, pasi të dënuarit kanë të drejtë të apelojnë.
Përveç çështjes së drogës, gjykata ka dhënë edhe një dënim tjetër ndaj Sarah Khalifa. Ajo dhe persona të tjerë janë dënuar me pesë vite burg në lidhje me një çështje të veçantë për rrëmbimin dhe sulmin ndaj një të riu.
Sarah Khalifa ka qenë e angazhuar edhe në biznese private, përfshirë një klinikë të kirurgjisë estetike dhe një kompani që merret me organizimin e eventeve.
Discussion about this post