Ndërsa afati për regjistrimin e fëmijëve në klasën e parë përmes sistemit e-albania përfundon më 30 qershor, qytetarët po përballen me vështirësi, ndërsa nuk po marrin përgjigje as nga adresa e e-mail e publikuar pak ditë më parë nga ministrja e Arsimit, Evis Kushi.
Veçanërisht problem shfaqin prindërit e fëmijëve, të cilët ende nuk i kanë mbushur 6 vjeç, por u takon të regjistrohen në klasën e parë, si një risi për vitin shkollor 2023-2024.
“Tashmë prej disa ditësh në sistemin e-Albania kanë nisur regjistrimet e nxënësve në klasat e para për vitin shkollor 2023-2024. Afati për këtë shërbim online është data 30 qershor 2023 dhe të gjithë prindërit që kanë nevojë për ndihmë do të mbështeten nga stafe të dedikuara në çdo shkollë. Për çdo pyetje apo paqartësi rreth procesit, mund të kontaktoni në adresën:[email protected]”, shkruan ministrja Evis Kushi në facebook.
Ministrja e Arsimit njoftonte se risi këtë vit në regjistrime do të jetë edhe ulja e moshës së pranimit të fëmijëve që do të mund të ndjekin klasën e parë. Konkretisht, referuar ndryshimeve të bëra në ligjin për arsimin parauniversitar, në vitin shkollor 2023-2024 në klasën e parë do të mund të regjistrohen edhe fëmijët të cilët moshën 6 vjeç do ta mbushi deri në datën 31 dhjetor të këtij viti.
Ky rregull nuk është me detyrim. Do të jenë vetë prindërit ata që do të vendosin nëse do të vendosin për dërgimin e fëmijës në klasë të parë edhe pa mbushur moshën 6 vjeç.
Në adresën e gijotina.com janë me dhjetra denoncime nga prindër të cilët nuk arrijnë të regjistrojnë fëmijët, por edhe nuk marrin asnjë përgjigje nga adresa e e-mail e bërë publike nga Ministria e Arsimit.
Shqetësimi i ngritur prej tyre është i njëjtë: përmes e-albania nuk mund të bëhet regjistrimi për fëmijët që bëjnë 6 vjeç deri në dhjetor dhe se askush nuk përgjigjet në adresën e e-mail që është vendosur për support.
E ndërsa për aplikimin për e-albania ndoshta nuk është përgjegjësia e Ministrisë së Arsimit, moskthimi i përgjigjes në adresën që ky institucion ka vendosur, është përgjegjësi direkte e personave që duhet të japin suportin.
Por duket se nga zyrtarët e arsimit kanë vendosur që fillimisht të përfundojnë regjistrimet për fëmijët që e kanë mbushur moshën 6 vjeç për klasën e parë, duke krijuar ndoshta kështu një ide mbi numrin e përgjithshëm të fëmijëve që regjistrohen, dhe më pas të vijojnë me atë që e konsiderojnë si “risi”.
Discussion about this post