Dhuna e Rrajave, Prokuroria kërkon riekspertim mjeko-ligjor për Bilbil e Jashar Majën

Prokuroria e Tiranës, ka kërkuar riekspertimin mjeko-ligjor të dëmtimeve në kokë dhe trup ndaj dy personave të plagosur, Bilbil Maja dhe Jashar Maja.

Vendimi për kryerjen e një ekspertimi të dytë është marrë ditën e sotme, ku prokuroria shpreson të mbajë në këmbë çështjen penale kundër 9 anëtarëve të fisit Rraja.

Janë caktuar tre ekspertë mjeko-ligjorë të rinj, të cilëve tashmë u është besuar ekzaminimi i dëmtimeve të shkaktuara me sende të forta ndaj Jashar dhe Bilbil Majës.

Jashar Maja, i cili u dhunua barbarisht nga fisi Rraja kërkoi riekspertim, duke u shprehur se ka ende fraktura. Ditën e djeshme, Jashar Maja tregoi se nuk e ka lexuar dokumentin që ka firmosur.

Gjithashtu nga grafitë e kockave të cilat tregojnë edhe dëmtimet që ka pësuar Bilbil Maja, bëhet fjalë për thyerje në kockën e kokës si edhe thyerje të dorës.

Si pasojë e lëndimeve të mëdha, mësohet se ai do të operohet në Itali, pasi në vendin tonë është e vështirë të kryhet një ndërhyrje për një dëmtim të tillë.