Në ditën e 62-të të protestës qytetare në Tiranë, aktivistja Sidorela Vatnikaj u shpreh se mobilizimi ka tejkaluar çdo pritshmëri dhe se, sipas saj, u ka rikthyer shpresën shqiptarëve brenda dhe jashtë vendit.
Duke folur para protestuesve, Vatnikaj tha se kërkesa kryesore mbetet dorëheqja e kryeministrit Edi Rama, ndërsa akuzoi qeverinë se jo vetëm nuk ka reflektuar ndaj kërkesave të qytetarëve, por ka zgjedhur t’i etiketojë ata me terma përçmues.
“Jemi në ditën e 62-të të protestës që askush nuk e priste të ndodhte, por që u ka kthyer buzëqeshjen shqiptarëve brenda dhe jashtë Shqipërisë. Edhe sot kërkojmë dorëheqjen e kryeministrit. Në çdo vend normal, pas kaq ditësh protestë, kërkesat e qytetarëve do të ishin dëgjuar, ndërsa tek ne ato vetëm janë shtuar”, u shpreh ajo.
Vatnikaj iu referua deklaratave të kryeministrit ndaj protestuesve, duke thënë se fillimisht ata u quajtën “agjentë”, më pas “të paguar” dhe së fundmi “korba dhe sorra”.
“Ne jemi flamingo, sepse na detyruat të shtegtojmë pasi keni vjedhur për katër mandate. Por dimë të jemi edhe korba e sorra që luftojnë ata që, si ju, grabisin shtetin dhe i detyrojnë shqiptarët të largohen”, deklaroi ajo.
Në fjalën e saj, aktivistja renditi edhe kërkesat e protestës. Sipas saj, kërkesa e parë mbetet dorëheqja e kryeministrit Edi Rama dhe e kabinetit qeveritar. Ajo kërkoi gjithashtu vendosjen e kufizimit me dy mandate për postin e kryeministrit gjatë gjithë jetës politike, anulimin e disa ligjeve të miratuara nga mazhoranca, si dhe reformimin e partive tradicionale dhe ndryshimin e sistemit politik.
Vatnikaj shtoi se protestuesit synojnë ndërtimin e një “Shqipërie të re”, duke theksuar se kontrata e tyre është me qytetarët dhe jo me interesat e politikës apo oligarkisë.
Ndersa ish-luftëtari i UÇK-së Meçan Zotaj, i cili që nga dita e parë e revoltës ka protestuar në shesh, nga tubimi para Kryeministrisë, qe ka hyrë në ditën 62-të, ka bërë thirrje për mobilizim kundër qeverisë dhe kundër ndryshimeve të propozuara për pushtetin vendor. Ai u bëri apel banorëve të bashkive të vogla që të reagojnë ndaj reformës territoriale, duke përmendur disa zona si Libohova dhe Maliqi.
“Edhe në fund, Policani u ngrit kundër Ramës. Libohova, Maliqi, të gjitha bashkitë e vogla, të ngrihen në protestë”, u shpreh aktivisti.
Rama gjenocidial me qeverinë e tij duan që të spastrojnë shqiptarët. Me njerëz anë e mbanë botës. Ne respektojmë nacionalitetet që vijnë si vizitorë, por s’do të respektojmë një qeveri që nuk respekton qytetarët e vet. Shqiptarë, socialistë, çohuni. Mos qëndroni në një parti që lufton për pastrimin e Shqipërisë. Çohuni, kapini dhe digjini ato libreza (tesera partie), se jetoni dhe pa ato. Dinjiteti nuk varet nga Edi Rama dhe nga një teserë që ju mban lidhur. Hajdeni në shesh me ne, që t’i themi boll Tiranisë.”, tha ai.
Aktivisti akuzoi qeverinë për politika që, sipas tij, po nxisin largimin e shqiptarëve dhe u bëri thirrje qytetarëve, përfshirë mbështetësit e Partisë Socialiste, që të reagojnë. Në fund, ai ftoi qytetarët që t’u bashkohen protestave, duke theksuar se qëllimi është kërkesa për ndryshim politik dhe më shumë përgjegjësi nga institucionet.
gijotina.com/
Discussion about this post