Në protestën e 76-të para Kryeministrisë, një e re nga diaspora e Michiganit përcolli një mesazh të fortë për Shqipërinë dhe shqiptarët.
Ajo tha se kishte ardhur në vendin e saj për pushime, por zgjodhi të bëhej pjesë e protestës dhe të fliste për shpresën.
“Pse duhet të besoj përsëri? Pse të mos largohem?”, tha ajo, duke iu referuar largimit të vazhdueshëm të shqiptarëve nga vendi.
Sipas saj, diaspora nuk duhet parë thjesht si njerëz që kanë ikur, por si pjesë e së njëjtës Shqipëri.
Ajo e cilësoi patriotizmin si respekt për vendin, gjuhën, natyrën dhe njerëzit, por edhe si guxim për të ngritur zërin.
Duke kujtuar fëmijërinë dhe historinë shqiptare, ajo tha se tashmë shqiptarët po shkruajnë një tjetër kapitull të historisë së vendit.
E reja theksoi se gjatë ditëve të protestave ka takuar shumë njerëz dhe se, pavarësisht zhgënjimit, te ta sheh ende shpresën.
“Fuqia më e madhe që ka njeriu është fuqia e shpresës”, u shpreh ajo para protestuesve.
Ajo pranoi se shqiptarët janë lodhur nga krizat, ndryshimet politike dhe zhgënjimet e njëpasnjëshme.
Por sipas saj, një Shqipëri e re nuk mund të ndërtohet nga një individ, por vetëm përmes angazhimit të të gjithëve.
Në fjalën e saj, një pjesë e veçantë iu kushtua diasporës dhe largimit të të rinjve shqiptarë.
Ajo tha se numri i shqiptarëve që jetojnë jashtë vendit duhet të shërbejë si një alarm për shoqërinë dhe politikën.
“Ne nuk duam një Shqipëri që i kërkon fëmijëve të saj të largohen për të pasur një jetë dinjitoze”, theksoi ajo.
Sipas saj, Shqipëria duhet të jetë një vend ku puna shpërblehet, merita vlerësohet dhe ligji zbatohet njësoj për të gjithë.
“Fëmija i një fshatari duhet të ketë po aq mundësi sa fëmija i një pushtetari”, ishte një nga mesazhet e saj më të forta.
Discussion about this post