Një i ri ka rënë në prangat e policisë së kryeqytetit, pasi u identifikua si një nga autorët që ka hedhur kapsolla ndaj kordonit të policisë së shtetit gjatë protestës së djeshme të opozitës. Policia njofton se në pranga ra 19-vjeçari nga Tirana, ndërsa 4 të tjerë janë proceduar penalisht. Sipas Policisë, po vijon ende puna me këqyrjen e pamjeve filmike për identifikimin e personave të tjerë të përfshirë në veprimtari kriminale.
Tre efektivë mbetën të lënduar prej kapsollave që u hodhën në drejtim të kordonit të policisë në momentin kur në podium u ngjit kreu i Partisë Demokratike, Sali Berisha.
Njoftimi i Policisë
Në vijim të veprimeve hetimore dhe procedurale, të kryera për identifikimin dhe kapjen e personave që hodhën lëndë piroteknike drejt punonjësve të policisë të planizuar me shërbim para Kryeministrisë më datë 08.02.2025, Specialistët për Hetimin e Krimeve në Komisariatin e Policisë Nr. 1, identifikuan dhe arrestuan shtetasin E. T., 19 vjeç, banues në Tiranë.
Ky shtetas dyshohet se në bashkëpunim me persona të tjerë ende të paidentifikuar, kanë hedhur lëndë plasëse artizanale dhe lëndë piroteknike në drejtim të punonjësve të policisë të planëzuar me shërbim, ku si pasojë kanë mbetur të dëmtuar dhe kanë marrë ndihmë mjekësore në spital 3 punonjës policie.
Gjithashtu, nisi procedimi në gjendje të lirë për shtetasit O. Gj., 18 vjeç, A. D., 40 vjeç, D. C., 19 vjeç, të tre banues në Korçë dhe F. L., 24 vjeç, banues në Tiranë.
Pas përfundimit të protestës është këqyrur vendi i ngjarjes, ku janë sekuestruar në cilësinë e provës materiale objekte dhe sende të hedhura në drejtim të punonjësve të Policisë dhe selisë së Kryeministrisë, të cilat janë dërguar për ekspertim të mëtejshëm.
Vijon këqyrja e pamjeve filmike për identifikimin e personave të tjerë të përfshirë në veprimtari kriminale.
Materialet procedurale iu referuan Prokurorisë së Tiranës, për veprime të mëtejshme.
Discussion about this post