Skuadra e Barcelonës përballet me Espanjolin në kampionat, testi i parë i trajnerit Ksavi Hernandez me katalanasit. Trajneri i ekipit blaugrana komenton vigjiljen e kësaj sfidë dhe gjendjen e skuadrës.
“Espanjol është skuadër e mirë, kanë një organizim të fortë në mbrojtje dhe në sulm. Ata kanë patur kohë për tu përgatitur për këtë ndeshje. Do të jetë e vështirë.
Objektivi është fitorja. Nuk jemi në pozicionin më të mirë. Barça duhet të luftojë për tituj, por do të shohim sa larg mund të shkojmë.
Më ka surprizuar talenti i lojtarëve të skuadrës. Ka ritëm, dëshirë dhe vullnet për të punuar. Të gjithë janë pozitivë dhe të emocionuar. I kemi lodhur pak këto ditë, por është e nevojshme.
Jam shumë i qetë, por në të njëjtën kohë dhe i emocionuar. Jam në shtëpinë time. Më e vështirë është të jesh futbollist dhe t’i bësh gjërat në fushën e lojës.
Alvesh do të na japë një shtysë të madhe. Ai ka karakter dhe mentalitet fituesi. Ai është në formë të mirë fizike. Është një ndër lojtarët më të mirë që kam parë në karrierën time. Më vjen keq që nuk luan dot deri në janar.
Do të përpiqemi që të luajmë mirë. Mendojmë se është më e lehtë që të arrish fitoren duke luajtur kështu. Jemi në emergjencë sepse ndodhemi të nëntët”, theksoi trajneri Ksavi Hernandez.
Discussion about this post