Derbi të Italisë nuk i mungon kurrë tensioni. Përballja mes Juves e Interit, në gjysmëfinalen e parë të Coppa Italia, përfundoi 1-1, duke bërë që finalistja të caktohet edhe de facto në sfidën e ardhshme në “San Siro” më 26 prill.
E nëse kishte paqe për sa i përket rezultatit, nuk ndodhi e njëjta gjë në fushë, pasi goli i barazimit, i shënuar nga Romelu Lukaku në shtesë, provokoi “Luftën e Tretë Botërore”.
Arbitri ndëshkoi sulmuesin belg me kartonin e dytë të verdhë dhe e largoi nga fusha për sekondat e mbetura, por tensioni vijoi edhe pas fundit të ndeshjes.
Protagonistë ishin kapiteni zikaltër Samir Handanoviç dhe anësori kolumbian Juan Cuadrado, me këtë të fundit që nuk ngurroi të godasë me grusht në fytyrë gardianin e Interit.
Handanoviç dhe veçanërisht Cuadrado, rrezikojnë të pezullohen për një afat të gjatë.
Kështu portieri i Interit është e sigurt që do të mungojë në ndeshjen e kthimit për shkak të kartonit të kuq, ndërsa Cuadrado do të humbë si gjysmëfinalen e dytë, ashtu edhe finalen, pasi plotësoi edhe numrin e kartonëve të verdhë, por u ndëshkua edhe me karton të kuq.
Gjithsesi pritet të merren në shqyrtim videot e sherrit dhe për grushtin ndaj Handanoviç, Cuadrado pritet të pezullohet minimalisht 5 ndeshje, por mund të shkojë edhe më keq.
Gjithashtu, dënimi nga organet e Disiplinës merr fuqi edhe në kampionat, ndaj Cuadrado rrezikon të humbë një pjesë të mirë të ndeshjeve të Juventusit në këtë fund të sezonit.
Discussion about this post