Partia Socialiste ka kërkuar çregjistrimin e kandidatit të koalicionit ‘Bashkë Fitojmë’ për Bashkinë e Shijakut, Rezeart Tusha. Sipas kërkesës së dorëzuar nga Eridian Salianji, Sekretar për Çështjet Ligjore dhe Zgjedhore të PS në Komisionin Qendror të Zgjedhjeve, Tusha, emri i zgjedhur nga koalicioni mes kryedemokratit Sali Berisha dhe kreut të Partisë së Lirisë, Ilir Meta, është dënuar në Zvicër. Salianji shton se Komisioneri duhet të kryejë një hetim të plotë dhe të shpejtë ndaj Tushës, pasi ky i fundit, sipas PS-së, nuk plotëson kriteret ligjore për të qenë një kandidat për kryetar bashkie në zgjedhjet e 14 majit.
“Aktualisht KQZ ka rastin që zgjedhësve të Bashkisë Shijak t’u ofrohet për zgjedhje një kandidaturë që të garantojë “besimin e publikut për funksionin e organeve të zgjedhura shtetërore” dhe në këtë kuadër kandidati Rezeart Tusha nuk e ofron aspak këtë garanci. Ndërprerja e kandidimit duke bërë çregjistrimin e në këtë fazë, në një eventualitet, mbron dhe garanton mirëfunksionimin demokratik të organeve të qeverisjes vendore”, thuhet në dokument.
Lajmi për dënimin për trafik droge dhe dëbimin e Tushës nga Zvicra është publikuar edhe më herët, para zgjedhjeve parlamentare të 25 prillit të vitit 2021, ku u publikuan listat me kandidatët për deputetë dhe ai ishte pjesë e tyre.
Por, vetë Tusha i cilësoi si shpifje këto lajme. Në atë kohë, në një prononcim për Top Channel, ai u shpreh se nuk ka fshehur asgjë dhe në formularin e dekriminalizimit gjendet vendimi për largimin nga Zvicra për shkak të skadimit të dokumenteve. Rezeart Tusha shprehet së një akuzë e tillë është e përsëritur, por ai ka çdo dokument që vërteton pastërtinë e tij penale.
Discussion about this post