Kjo e martë shënoi zhvillimin e protestës së dhjetë para Bashkisë së Tiranës, ku pjesëmarrësit kërkuar dorëheqjen e Erion Veliajt si kryebashkiak i Tiranës dhe vënien e tij para drejtësisë. Veliaj cilësohet “pronari faktik i inceneratorit të Tiranës” dhe “koka e bandës së drejtorëve hajdutë”.
Tubimet nisën pas arrestimeve të drejtorëve të Veliajt lidhur me procedimin penal të njohur si “5D” dhe kanë vijuar në mënyrë periodike çdo javë. Ashtu si herët e kaluara, edhe këtë të martë organizimi ishte i ngjashëm. Me pankarta në duar, thirrje dhe fjalime nga podiumi i protestës, të pranishmit në tubimin e nisur rreth orës 11:00 kërkuan arrestimin e Veliajt dhe dorëheqjen e tij.
Aktori Mehdi Malkaj vuri në dukje mos reagimin e ndërkombëtarëve për aferat në bashkinë e Tiranës. “Ku janë këta ambasadorët amerikanë, anglezë? Pse nuk dalin dhe thonë gjysmë fjale për këtë qelbësirë? Unë jam protestues dhe do të protestoj derisa të kem frymë”, tha ai.
Aktori tjetër Neritan Licaj u shpreh se “po shkatërrohet kombi, po ikin shqiptarët, po ikin për t’u bërë skllav”.
Këshilltari i PL-së, Tedi Blushi u zotua se Velian “do të japë llogari para drejtësisë pavarësisht se fshihet në skuta”.
Ndërsa ish-deputeti Belind Këlliçi u bëri apel qytetarëve që ti intensifikojnë protestat.
Protestuesit, ndryshe nga herët e tjera kur kanë goditur godinën me molotov, kësaj radhe i kanë vënë zjarrin disa gomave të vjetra. Para se t’u vihej zjarri, protestuesit kanë pasur përplasje me policinë, që nuk lejonte ndezjen e gomave duke përdorur fikëse zjarri.
Efektivët e pranishëm në terren që kishin rrethuar e fortifikuar bashkinë, e lëshuan lëndën zjarrfikëse edhe ndaj protestuesve.
Por, pas ndërhyrjes së deputetëve opozitarë, protestuesit arritën t’u vinin zjarrin gomave, ndërkohë që vijonte fjalimi i Belind Këlliçit, i cili dënoi veprimet e policisë që hodhi gaz ndaj qytetarëve. Gjithashtu, protestuesit kanë hequr gardhin metalik dhe kanë lëvizur nga vendi blloqet e betonit.
Protesta zgjati rreth një orë ndërsa e radhës u lajmërua të hënën e ardhshme. Përfaqësues të opozitës u bënë apel qytetarëve që t’iu bashkohen edhe në protestën e paralajmëruar për tu zhvilluar të enjten para Kuvendit. Protestë e thirrur pas publikimit të puntatës së dytë të emisionit “Report” në “Rai3”, ku u bënë akuza të forta ndaj qeverisë Rama si e korruptuar dhe e lidhur ngushtë me krimin.
Veliaj, nga ana tjetër, ka sulmuar protestat në daljet e tij publike, ndërsa është vetdeklaruar i pafajshëm.
Ndërkohë, opozita vijon me denoncimet publike dhe kallëzimet në SPAK të të tjera aferave të dyshuara në Bashkinë e Tiranës, në qendër të së cilave është Erion Veliaj dhe zyrtarët e zgjedhur prej tij.
Së fundmi, në media është publikuar një dokument që zbulon nisjen e një hetimi pasuror për Veliajn dhe familjarë të tij nga Prokuroria e Posaçme.
Discussion about this post