Punonjësit e inceneratorit të Elbasanit kanë dalë sot në protestë për faktin që kanë 2 muaj pa marrë rrogat. Por në momentin që ata kanë dashur të flasin për mediat, janë hasur me një incident. Aty ka dalë një nga përfaqësuesit e landfillit i cili kërcënoi ata dhe mediat, duke thënë se nuk ka për të folur asnjë dhe për këtë gjë vendos tjetër kush.
“Nuk ka për të folur asnjë. E vendos kush e vendos” tha një ndër përfaqësuesit e landfillit, që i merr brenda punëtorët që po protestonin.
Nga ana tjetër, përgjegjësi i inceneratorit Enea Murataj pohoi për mediat se punonjësit nuk janë shlyer vetëm për rrogën e muajit janar, por që sipas tij kjo procedurë mbyllet brenda datës 20 të këtij muaji. Murataj pretendon se protesta e sotme është e shtyrë politikisht.
Ndërkohë kujtojmë se vetëm javën e shkuar komisioni hetimor zbarkoi në inceneratorin e Elbasanit ku nuk munguan as përplasjet mes përfaqësuesve ta mazhorancës dhe opozitës pasi këta të fundit e konsideruan një shfaqe teatrale.
Discussion about this post