Policia Kufitare e Durrësit ka sekuestruar një mjet lundrues të tipit “Jet ski” që u denoncua nga qytetarët pasi nën drejtimin e të riut me iniciale E.T., kryente manovra të rrezikshme në breg të detit, shumë pranë pushuesve.
Mësohet se i riu është ndëshkuar me gjobë për shkak edhe të mungesës së dokumenteve për mjetin lundrues, ndërsa është bllokuar pa afat “Jet ski” në pronësi të tij.
Gjatë kësaj jave, në të gjithë zonën bregdetare, janë zhvilluar kontrolle të hërëpashershme për mjetet lundruese dhe për zbatimin e detyrimeve për të mos lundruar në zonat e mbrojtura me bova.
Si rezultat i kontrolleve, nga Ksamili në Velipojë, janë verifikuar 31 mjete lundruese, kryesisht “Jet ski” dhe skafe, për dokumentacionin që duhet të kenë, si dhe për t’u bërë me dije sanksionet, drejtuesve të tyre, në rast shkeljeje të perimetrit të sigurisë së pushuesve.
Policia Kufitare do të vijojë intensivisht kontrollet në të gjithë vijën bregdetare dhe apelon për të gjthë ata shtetas që kanë në përdorim apo japin me qira për përdorim mjete argëtuese lundruese, të tregojnë kujdes maksimal për të respektuar detyrimet, me qëllim rritjen e sigurisë së jetës së pushuesve në plazhe.
Discussion about this post