Policia e Tiranës ka dalë me një komunikatë për mediat në lidhje me arrestimin e 34-vjeçarit Klajdi Buza, i cili hapi zjarr ndaj efektivëve në momentin kur shkuan ta arrestonin, pas informacioneve se ishte i armatosur.
Blutë e kryeqytit bëjnë me dije se ngjarja ka ndodhur në biznesnin privat për makina të 34-vjeçarit, pranë zonës së Rinasit.
“Shërbimet e Forcës Operacionale të DVP Tiranë pasi kanë marrë informacion për një shtetas i cili mbante armë zjarri në subjektin e tij kanë organizuar punën me qëllim kapjen dhe vënien përpara përgjegjesisë ligjore.
Gjatë ndalimit të shërbimeve të Policisë në subjektin e tij privat në Rinas, shtetasi i identifikuar me inicialet Klajdi Buza, ka qëlluar në drejtim të Policisë nga brenda subjektit të tij.” – thuhet në njoftimin e Policisë
Fatmirësisht nga të shtënat nuk ka patur të lënduar, teksa Policia ka arritur ta neutralizojë dhe ta vendosë në pranga Klajdi Buzën.
Nga pamjet e publikuara nga Policia, plumbi i dalë nga pistoleta e 34-vjeçarit është ngulur mbi reklamën e biznesit të tij.
Policia ka sekuestruar në cilësinë e provës materiale armën e zjarrit pistoletë dhe municion luftarak.
Klajdi Buza rezulton një person me precedent penal. Ai është arrestuar në dhjetor të vitit 2022 në Fushë-Krujë, pasi u kap duke qarkulluar me mjetin tip “Porsche”, teksa me vete kishte një armë zjarri pistoletë me fishekë në fole gati për qitje.
Ndërkohë në vitin 2015, ai denoncoi vjedhjen e makinës së tij, ndërsa policia në atë kohë njoftoi se mjeti ishte gjetur i braktisur në vendin e quajtur ura e Gjoles në Fushë Krujë. 34-vjeçari konsiderohet si një person problematik, i cili është përfshirë edhe në disa konflikte.
Materialet i kaluan Prokurorisë së Tiranës për veprime të mëtejshme procedurale.
Discussion about this post