Kryetarja e LSI-së, Monika Kryemadhi është përplasur në Kuvend me ministren Bora Muzhaqi, kreun e grupit parlamentar të PS-së, Taulant Balla dhe ministren Elisa Spiropali. Debati filloi kur Kryemadhi thirri në Kuvend ministren, Bora Buzhaqi dhe jo Muzhaqi. Edhe pse kërkoi falje, ky gabim i saj me ose pa dashje, solli edhe reagimin e kreut të grupit parlamentar të PS-së, Taulant Balla.
“E dashur Monikë, jemi kolegë të vjetër, Muzhaqi është mbiemër shumë i madh dhe i uroj Borës si vajzë e re që ta justifikojë mbiemrin që mban dhe do ju kërkoja që askush në këtë sallë të mos keqinterpretojë mbiemrat, loja me mbiemrat nuk i shkon askujt, vijnë nga Muzaka, një fis që ka luftuar për këtë vend, fisi nga vjen e Bora e kanë vuajtur shumë diktaturën” – tha Balla.
Por Kryemadhi nuk e ka lënë me kaq dhe reagimi i saj ka qenë i menjëhershëm.
“Qeveria e Skënderbeut tonë, nuk ka nevojë për dado, kush është ministër e çon punën e vet deri në fund, se prandaj janë ministër” – tha Kryemadhi.
Kryemadhi është përplasur edhe me ministret socialiste Elisa Spiropali dhe Bora Muzhaqi. Ajo tha se Muzhaqi nuk duhet të mbyllë karrierën e saj me ligën e Inceneratorëve duke zhvlerësuar arsimin që ka marrë jashtë vendit. Në atë moment ndërhyri edhe Spiropali, e cila u përplas me kryetaren e LSI-së.
Pjesë nga debati në Kuvend:
Bora Muzhaqi: Shqiptarët kudo ku shkojnë rezultojnë të jenë të parët në një fushë apo në një tjetër. Shpresë për të rinjtë shqiptarë ka plot. Nëse shkoni dhe i takoni nga qyteti në qytet hasni me të rinj shqiptar që janë plot shpresë.
Monika Kryemadhi: Në respekt të procedurës i kërkoj falje që i ngatërrova mbiemrin. Shifrat kanë vlerë por edhe optimizmi është i rëndësishëm. Të rinjtë shqiptarë kanë shpresë se kanë Bora Muzhaqin në qeveri dhe shumë të tjera. Por nuk kanë shpresë studentët. Po të ishte për t’u marrë me ty do ishte shumë e thjeshtë për t’u marrë me ty. Ti mos u përdor. Mos e zhvlerëso shkollën që ke bërë sepse ka me qindra të tjerë që shohin diçka tjetër te ty. Mos e mbyll karrierën tënde politike me ligën e vjetër të Inceneratorëve.
Monika Kryemadhi: Elisa ti ke Skënderbeun. Mos u shqetëso fare. Të të rrojë Skëndërbeu. Në fund të fundit ky ishte shpërblimi që ti more. Thjesht je aty rojtare.
Elisa Spiropali: Kujdes Hamzain, po vjen në politikë
Monika Kryemadhi: Keni marrë peng Shqipërinë dhe shqiptarët
Discussion about this post