Pas konsultimit me shoqatat e biznesit, Dhomën e Tregtisë dhe Industrisë-Tiranë dhe sipërmarrës të prodhimit vendas, Ministria e Financave dhe Ekonomisë ndryshon paketën fiskale 2022. Ndryshimet janë reflektuar në projektligjin “Për taksat kombëtare” që vendos taksë për qumështin pluhur që përdoret për tregti në vlerën 100 lekë për kg.
Fabrikat e përpunimit të qumështit nuk do të taksohen për qumështin pluhur. Qeveria është tërhequr nga propozimi për taksimin prej 100 lekë për kg për qumështin pluhur. Ky vendim vjen pas kërkesave të industrisë së përpunimit të qumështit në vend. Vendimi ligjëron faktin se fabrikat e prodhimit te qumështit në Shqipëri përdorin në masë qumështin pluhur pasi reagimi ishte i menjëhershëm në lidhje me këtë taksë. Në propozimin e parë qeveria theksonte se taksimi i qumështit pluhur u bë për të dekurajuar importin e qumështit pluhur dhe për të favorizuar prodhimin e qumështit nga fermerët.
Një tjetër ndryshim është edhe vendosja e taksës për pijen e homogjenizuar (barista) në vlerën 16 lekë për litër. Vendosja e taksës kombëtare 16 lekë/litër për pijet e homogjenizuara (barista) dhe përjashtimin nga pagesa e kësaj takse të gjitha fabrikat e përpunimit të produkteve të qumështit apo edhe produktet e tjera për qumësht pluhur, krem qumështi, hirrë qumështi të cilat kanë kartat teknologjike të produktit fundor me përbërje qumësht pluhur u propozuan nga DHTIT në ndihmë të sektorit të përpunimit të qumështit pas prezantimit të paketës fiskale që me heqjen e TVSH-së 6% dhe vendosjen e taksës për qumështin pluhur penalizonte industrinë.
Me paketën e re u propozua heqja e TVSH-së të rimbursueshme nga 6% që është aktualisht për agroindustrinë bujqësore. Parashikohet që skema e rimbursimit të TVSH-së të zëvendësohet me skema subvencionuese, por ende nuk është prezantuar projekt konkret. Ndryshimet fiskale propozojnë edhe vendosjen e akcizës për gazin 6 lekë/litri nga zero që është aktualisht.
Mbështetur në rekomandimit e Fondit Monetar Ndërkombëtar (FMN) është propozuar heqja e rimbursimit për lëndët djegëse të cilat përdoren për nevoja teknologjike për sektorë, si: farmaceutika, tullat, çimento, birra dhe nafta bruto. Projektligji “Për Tatimin Mbi Vlerën e Shtuar”, përjashton nga TVSH-ja për importimin e makinerive dhe pajisjeve në funksion të realizimit të kontratave të investimeve me vlerë të barabartë ose më të madhe se 500 milionë lekë nga 50 milionë lekë që është aktualisht.
Discussion about this post