Kryeministri britanik Boris Johnson ka kërkuar falje për një festë të mbajtur në Downing Street gjatë karantinës së parë të vendosur kundër koronavirusit. Faljen, Johnson e ka kërkuar ndërsa përballej me deputetët në Parlament.
Në një seancë intensive në parlament të mërkurën, lideri laburist i opozitës Sir Keir Starmer i bëri thirrje Johnson të jepte dorëheqjen. Zhvillimet vijnë në një kohë kur në vend ka një zemërim të publikut mbi akuzat e fundit se kryeministri dhe stafi i tij shpërfillën kufizimet duke bërë një festë në maj të vitit 2020.
“Dua të kërkoj falje. Unë e di se miliona njerëz në të gjithë këtë vend kanë bërë sakrifica të jashtëzakonshme gjatë 18 muajve të fundit. E di zemërimin që ndjejnë me mua dhe me qeverinë që unë drejtoj, kur mendojnë se në vetë Downing Street rregullat nuk ndiqen siç duhet nga njerëzit që bëjnë rregullat”, tha Boris Johnson teksa doli para deputetëve.
Pretendohet se dhjetëra nga stafi i Johnson, si dhe vetë kryeministri së bashku me gruan e tij, morën pjesë në eventin në kopshtin e Downing Street gjatë izolimit të parë të koronavirusit, në një kohë kur grumbullimet ishin të ndaluara.
Discussion about this post