Organizata “Sebastia”, e shqetësuar nga dëmtimi i rëndë që ka pësuar në vitin e fundit ura e Milotit, njohur gjerësisht si “Ura e Zogut” ka zhvilluar sot një protestë, ku i bën thirrje qeverisë, të mos cenoje dinjitetin e historisë shqiptare. Protestës i janë bashkëngjitur edhe qytetarët e zonës, ku me pankarta në duar me mbishkrimet “Mbro identitetin”, “Mos e zhduk historinë”, “Kush nuk reagon është bashkëfajtor në krim”, ata kërkojnë që autoritetet të reagojnë për urën mbi lumin Mat që dikur lidhte verilindjen me pjesën tjetër të vendit. Në deklaratën zyrtare të Organizatës Sebastia shkruhet se, urën e ka shkatërruar babëzia e bosëve të kompanive të ndërtimit, që prej 3 dekadash shfrytëzojnë këtë lum për të nxjerrë inerte për ndërtim, pa kontroll, ilegalisht dhe legalisht kur behet fjalë për kompanitë e kontraktuara nga shteti.
“Të merren masa emergjentë për ndaljen e rrënimit të urës. Të hartohet një projekt nga specialistët e fushës për mbrojtjen afatgjatë të kësaj vepre historike. dhe të zbatohet ky projekt. Nuk mjafton më të ngrini grupe pune për vlerësimin e dëmeve dhe kjo vetem në letra, sipas përgjigjes së Institutit Kombëtar të Trashëgimisë Kulturore, por duhen aksione konkrete për Mbrojtjen e saj. Përndryshe, me këtë rënd dite shkatërrimi, do vijë një dite kur Shqiptarët dhe Shqipëria do të mbesë pa një identitet”, thuhet në deklaratë.
Ura e Zogut, një nga asetet e trashëgimisë kulturore të Kurbinit, e ndërtuar në vitin 1927 rrezikon shembjen dhe banorët e kësaj zone, prandaj bashkë me anëtarët e organizatës, ata protestojnë dhe thonë se nuk e tolerojnë këtë gjë.
E.H/ gijotina.com/
