Qumështi me alflatoksinë shkakton kancer/ Manush Kullolli mbron biznesmenët, refuzon të tregojë kompanitë

Në 4-mujorin e parë të vitit 2025, tetë nga kompanitë më të mëdha të prodhimit të qumështit në vend kanë tregtuar  qumësht me aflatoksinë.

Sipas OBSH-së, aflatoksina është kancerogjene e Grupit 1, rrit rrezikun për probleme në mëlçi dhe veshka.

Në dyqane, markete dhe supermarkete u shitën tonelata qumësht që i rrezikoi shëndetin konsumatorëve, ndërkohë që AKU nuk bëri asnjë njoftim për konsumatorin, edhe Ministria e Bujqësisë heshti.

Ky skandal është denoncuar fillimisht nga televizioni “Ora News”.

Për një investigim më të thelluar të kësaj situate gazetarja e “Ora News”, Alketa Çeku iu drejtua me një shkresë zyrtare AKU-së,  ku i kërkoi këtij institucioni të bëjë transparencë me qytetarët dhe të na informojë se cilat janë emrat e 8 kompanive  që i servirën qytetarëve në tryezë qumështin që i vuri në rrezik shëndetin.

Shkresa mban datën 22.04.2025, kanë kaluar 3 muaj dhe drejtuesi i AKU refuzon të bëjë publike emrat e 8 kompanive  kryesore në vend, ndërkohe që në aksionet e fundit shihet se AKU vepron me dorë të hekurt ndaj baxhove të vogla në çdo cep të vendit.

Televizioni “Ora News” iu drejtua Komisionerit për të Drejtën e Informimit, duke u nisur nga fakti që pika 1 e Nenit 1 e Ligjit për të Drejten e Informimit shprehet se “çdo institucion”, në këtë rast AKU, duhet të garantojë njohjen e publikut me informacion.

Pas hetimit administrativ nga ana e Komisionerit për të Drejtën e Informimit, përfaqësuesit e AKU u shprehën se “nuk e gjykojnë të nevojshme dhënien e këtij informacioni”.

Dikush duhet t’i rikujtojë zyrtarëve  të AKU se janë aty për të zbatuar ligjin e jo për të “gjykuar” ligje që nuk kanë nevojë për interpretim.

Pika 3 e nenit të LDI  shprehet qartë se “Çdo person ka të drejtë të njihet me informacionin publik nëpërmjet dokumentit origjinal, ose një kopje”

Në këtë rast Komisioneri shprehet se gazetarja synon informimin e opinionit publik duke i shërbyer këtij të fundit.

Për sa më sipër Komisioneri urdhëron AKU që deri në datën 27.6.2025 t’i kthejë përgjigje pyetjeve së gazetares Alketa Çeku:

Sa ka qenë sasia totale qumështit me aflatoksinë që u konstatua nga AKU?

Sa u konsumua nga qytetarët ?

Sa u bllokua?

Sa është sasia e asgjësuar?

Subjektet prodhuese të qumështit me aflatoksinë e kanë shpërndarë në kopshte dhe në çerdhe?

Por edhe pas këtij vendimi Manush Kullolli vijon të refuzojë dhënien e informacionit. Pse hesht z. Kullolli dhe fsheh dokumente që duhet t’i bëjë publike?

Me sa duket shqetësimi i drejtuesit të AKU nuk është transparenca dhe siguria ushqimore, por favorizimi i bizneseve të mëdha.