Ditën e sotme me qindra qytetarë shqiptarë janë dyndur në sportelet e Pikës Kufitare Greke të Kakavijes për të kaluar drejt shtetin fqinj. Të gjithë personat që duhet të kalonin kufirin, duhet të ishin të pajisur me PLF, me PCR test apo dhe me certifikatë digjitale antipandemike.
Radhë kilometrike janë krijuar dhe ende po shtohen për shkak të mungesës së sporteleve në dispozicion nga ana e palës greke e cila ndonëse punon me ritme të ulëta, po ushtron kontroll të rreptë tek qytetarët në bazë të protokolleve antipandemike.
Për shkak të radhëve dhe dyndjes në palën greke, drejtuesit e Policië Shqiptare të Kakavijes, kanë kërkuar shpjegime nga homologët grekë për konfuzionin e krijuar dhe për rrjedhojë fqinjët kanë shtuar edhe një sportel për të disiplinuar lëvizjet në hyrje të Greqisë.
Sipas Policisë Greke, dyndja veçanërisht ka ardhur si rrjedhojë e mungesës së sporteleve deri në mesditë çka ishin vetëm dy aktive, prej orës 11:30 minuta është shtuar edhe një sportel duke çliruar sadopak situatën. Deri në këto momente kanë kaluar në drejtim të Greqisë 832 persona ndërkohë që limiti ditor është 1500.
