Kryeministri Edi Rama e akuzoi kandidatin e koalicionit “Bashkë Fitojmë” për bashkinë e Himarës, Fredi Beleri se ka angazhuar persona që kërcënojnë emigrantët shqiptarë në Greqi që të vinë në Shqipëri dhe të votojnë për të.
“Ky maskara ka angazhuar njerëz për të kërcënuar emigrantët. Unë dua ta shfrytëzojë këtë emision për t’iu drejtuar dy personave me emër. Një Napolon Çakalli, i cili e di shumë mirë se kush është dhe një Spiro Koka, një tjetër personazh. Iu them që mos guxoni të merrni në telefon emigrantët që duan të votojnë ose që mund të vinë të votojnë, as për t’iu thënë që do vini të votoni patjetër për këtë injorantin këtu apo duke i thënë që po votuar për Goron e PS do iu grisim letrat greke dhe unë po iu them në sy do të merrem personalisht me ju të dy dhe jeni ju që rrezikoni që t’i humbisni letrat greke. Avokati më i madh i emigrantëve në Greqi dhe i minoritetit grek në Shqipëri jam unë dhe qeveria ime, është ky shtet”,-tha Rama.
Pas kësaj deklarate, Beleri ka reaguar “Live” për emisionin “Opinion”. Moderatori Blendi Fevziu e lexoi mesazhin e tij para kryeministrit Edi Rama.
“Himariotet e Amerikes qe ka bashkepunuar zoti Rama jane Greke kurse neve jo. Ata para dy ditesh ne menyre zyrtare publikisht mbeshteten kandidaturen time. Ne gjithe boten multikultura eshte vlere ne shqiperine e zotit Ramamekat. Kam bredhur gjithe Greqine per tju lutur gjithe himarioteve te vijne te votojne pa ju diktuar dhe pa ju imponuar kur se per cfare do te votojne. Personat qe permend zoti Rama nuk i njoh. Ne deklaraten time e kam cilesuar qe perkthimi ishte i pavertete dhe perkthyer shtrember qellimisht. Faleminderit”,-shkruan në reagimin e tij Beleri.
Ndërkohë, gjatë kohës që Fevziu lexonte mesazhin, Rama tha se Beleri duhet të mësojë të flasë shqip dhe greqisht pastaj të reagojë.
Discussion about this post