Kryeministri i Shqipërisë, Edi Rama, ka mbërritur në Beograd pak minuta më parë me një aeroplan të “Air Albania”. Lajmin e ka bërë të ditur drejtori i komunikimit në Qeverinë e Shqipërisë, Endri Fuga. Sakaq, bëhet me dije se ditën e nesërme kryeministri do të takojë presidentin e Serbisë, Aleksandër Vuçiç dhe zëvendëskryeministrin e Maqedonisë së Veriut, Nikola Dimitrov. Kreu i qeverisë shoqërohet nga Ardian Çela, Odeta Barbullushi dhe ministret Edona Bilali dhe Bora Muzhaqi.
Sipas burimeve, Takimit të tre liderëve në kuadër të iniciativës “Ballkani i Hapur” do t’i paraprijë një takim me përfaqësues të kompanive nga Shqipëria, Serbia dhe Maqedonia e Veriut, si dhe me përfaqësues të Këshillit Atlantik. Pas bisedimeve do të vijojë një konferencë e përbashkët për shtyp e Ramës, Vuçiçit dhe Dimitrovit.
Paraprakisht, zëvendëskryeministri maqedonas, Dimitrov është pritur në aeroportin e Beogradit, “Nikola Tesla” nga ministrja serbe për Integrime Evropiane, Jadranka Joksimoviq. Në një prononcim për Tanjug, Dimitrov tha se Maqedonia e Veriut, përkundër dorëheqjes së kryeministrit Zoran Zaev pas zgjedhjeve lokale, është plotësisht e përkushtuar ndaj iniciativës “Ballkani i Hapur”.
“Po vij në kohën kur siç e dini kanë përfunduar zgjedhjet lokale në Maqedoninë e Veriut, të cilat kanë lënë pasoja, madje në një farë mënyre krizë politike. Është e rëndësishme që ne si shtet të dërgojmë një sinjal si shtet dhe qeveria, plotësisht të përkushtuar ndaj iniciativës që lindi në Ballkan dhe që synon mbi të gjitha Ballkanin Evropian”, tha Dimitrov.
Nga ana tjetër, nënkryetari i Lidhjes Socialdemokrate të Maqedonisë (LSDM), Muhamed Zekiri, deklaroi sot se koha do të tregojë nëse iniciativa e “Ballkanit të Hapur” do të rrezikohet pas dorëheqjes së kryeministrit Zoran Zaev. Por Rama dhe Vuçiç nuk kanë bërë asnjë deklaratë rreth këtij fakti.
Discussion about this post