Kryeministri Edi Rama ka marrë pjesë në aktivitetin u zhvillua në bazën ajrore të Farkës, lidhur me menaxhimin e situatës së zjarreve në vend.
Pas ministrit Niko Peleshi, fjalën e mori kryeministri Rama ku fillimisht ngushëlloi dy djemtë që humbën prindërit në Gjirokastër në luftë për të shuar zjarret në banesë. Ndonëse ngjarja ndodhi para një muaji, Rama u kujtua në takimin e sotëm të shprehë ngushëllimet.
“U shpreh ngushëllimet publikisht dy djemve që humbën prindërit në tragjedinë për shkak të zjarrit. U shpreh mirënjohjen, respektin, vlerësimin e mundshëm dhe atyre që u angazhuan në këtë muaj zjarri dhe manifestuan një ndjenjë të lartë sakrifice dhe përkushtimi”.
Kryeministri nuk harroi të falenderojë forcat e armatosura, zjarrfikësit apo vullnetarët të cilët u angazhuan në vijën e parë të fronit. Si pasojë e punës së tyre, Rama iu premtoi një rritje rroge, ndërsa shtoi se do të kalben në burg atë që ndezën me qëllim zjarret.
“Dua t’u them të gjithëve, duke filluar nga trupa e re e agjencisë kombëtare civile, ne do të bëjmë atë që duhet për të rritur edhe pagën që nuk do jetë asnjëherë e mjaftueshme sepse nuk është e mjaftueshme askund kur kërcënohet jeta por është një motiv më shumë. Nuk dua të zgjatem por nuk mund të rri pa theksuar aspektin kriminal të këtyre vatrave të zjarrit që në një pjesë të madhe janë rezultat i rritjes së temperaturave dhe barbarisë së atyre që vrasin shpirtin e atdheut, plagosin trupin e atdheut dhe hedhin në erë mundimet, përkushtimin e shumë gjeneratave. Ata nuk meritojnë të jetë të lirë por të kalben prapa hekurave. Shpresoj që gjykatat të japin vendimet e duhura dhe gjykatësit të jenë në lartësinë e dhimbjes për vlera natyrore të dëmtuara”, tha Rama.
Rama nuk harroi as të justifikohej për performancën e punonjësve zjarrfikës kur tha se gushti ishte një muaj zjarresh që përfshiu tërë botën.
“Nuk do zgjatem me shtjellimin e tyre por dua të them me bindje se çfarë kemi parë deri tani për të parë me optimizëm rezultatin përfundimtar të këtij procesi. Ishte një muaj zjarresh që përfshiu botën dhe duke u afruar këtu te ne. Vuri në pozitë të vështirë vende të afërta që janë mësuar me sfidën e zjarreve të përvitshme dhe kishin nevojë për ndihmë. Këtu kam parasysh Italinë, Greqinë dhe Turqinë. Janë tre vende me struktura nga më të jashtëzakonshmet të mbrojtjes civile që i janë gjendur Shqipërisë gjithmonë kur ka pasur nevojë për mjete, por këtë herë e kishin të pamundur dhe kishin nevojë vetë për ndihmë”, tha Rama.
