Në një komunikim me gazetarët shqiptarë nga Beogradi, kryeministri Edi Rama bëri zëdhënësin e presidentit serb Alexandër Vuçiç, kur tha se ky i fundit mirëpret Kosovën në “Open Balkan”.
“Sot presidenti i Serbisë, më hapur se asnjëherë tjetër me thënë të drejtën, tha se mirëpret Kosovën, njësoj si dhe dy vendet e tjera. Kjo deklaratë testohet vetëm nëse Kosova vjen në këtë nismë, a do të ketë pengesë apo nuk do të ketë pengesë. Kjo nismë ka qenë një domosdoshmëri kohë më parë sesa të lancohej, kur ne e pamë që procesi i Berlinit të kishte përfunduar në një nismë samitesh, por nuk drejtohet përditë nga ata që janë në Berlin apo Bruksel. Kërkesa e faljes nga Serbia është vënia e kapakut. Unë them që falja vjen në fund, nuk vjen në fillim”, tha Rama.
Rama tha ndër të tjera se “Ballkani i Hapur” është thjesht “Procesi i Berlinit” që merret përsipër nga tre vendet e rajonit për t’i bërë realitet deklaratat.
“Kjo nismë ka qenë domosdoshmëri kohë më para se të lancohej. Procesi i Berlinit ishte i destinuar të kthehej në një proces samitesh dhe deklaratash pa e zbatuar. Ai ka vizionin dhe kornizën që është 100% si ai i Ballkanit të Hapur. Por nuk është një proces që drejtohet në Berlin dhe në Bruksel. Ballkani i Hapur është njësia që ngrihet në çdo vend, në çdo institucion kur zbatohet një projekt me fonde të huaja. Pra, është thjesht Procesi i Berlinit që merret përsipër nga ne për t’i bërë realitet ato që bëhen në deklarata”, tha Rama, duke nënvizuar dakordësinë se Serbia duhet të kërkojë falje ndaj shqiptarëve por kjo falje sipas tij vjen në fund dhe nuk mund të vijë në fillim duke cekur rastin e Gjermanisë dhe Francës.
Më herët Rama zhvilloi një konferencë të përbashkët me presidentin serb Alexandër Vuçiç dhe zv.kryeministrin e Maqedonisë së Veriut, Nikola Dimitrov.
Discussion about this post