Kryeministri i Shqipërisë, Edi Rama iu ka bërë thirrje liderëve të Ballkanit Perëndimor, që të refuzojnë propozimet e fuqive të jashtme dhe të vazhdojnë të besojnë në anëtarësimin në Bashkimin Evropian. Në një intervistë për gazetën prestigjioze “Financial Times”, Rama tha se: “Shqipëria nuk do të heq dorë kurrë nga Evropa dhe BE-ja, cilado qoftë forma e BE-së në të ardhmen”.
Sipas Ramës, llogaritjet politike të anëtarëve të BE-së kanë luajtur gjithashtu një rol në vonesat e 18 viteve të fundit që kur blloku u zotua t’i lejonte të hynin pasi të kishin përmbushur kriteret.
“Shqiptarët kanë zhgënjimet e tyre me Brukselin, por kjo nuk e ndryshon bindjen se ne duhet të jemi atje. Ne i kemi konsumuar të gjitha historitë e dashurisë më parë dhe martesat,” shtoi ai duke iu referuar lidhjeve fillimisht me Rusinë dhe më pas Kinën që Shqipëria kishte në epokën komuniste. “Ne po kërkojmë një martesë të re, jo për të vjetrat. Por sigurisht, kjo lloj martese është e vështirë”, tha kryeministri shqiptar.
Por ndonëse i bën thirrje vendeve të tjera të mos ndikohen nga Rusia apo Kina, vetë Rama “flirton” vazhdimisht me Turqinë. Ai ka treguar herë pas herë simpatinë për Erdogan duke vizituar Turqinë dhe duke e konsideruar presidentin si “kardesh” ose vëlla. Në vizitën e tij të fundit në Turqi, Rama falënderoi Erdogan për ndihmën në procesin e rindërtimit dhe në luftën kundër koronavirusit, ndërsa nuk i kurseu kritikat ndaj BE-së.
Sot që Erdogan vjen në Tiranë, Rama është kujdesur për çdo detaj, që nga momenti i pritjes në aeroport, ku shumë qytetarët kishin dalë më flamuj të kuq për të nderuar prezencën e Erdogan, deri të nisja e seancës së sesionit të ri parlamentar për këtë vit me presidentin turk. Kjo datë përkon me 554-vjetorin e vdekjes së heroit tonë kombëtar Gjergj Kastriot Skënderbeu, që duke njohur Ramën, s’mund të jetë kurrsesi rastësi.
Discussion about this post