Deputeti i Partisë Demokratike, Belind Këlliçi në një dalje për mediat ka komentuar raportin e inteligjencës ushtarake britanike, ku thuhet se 40 % e atyre që kalojnë Kanalin Anglez me gomone, drejt Mbretërisë së Bashkuar janë shqiptarë.
Deputeti Këlliçi tha se shqiptarët pavarësisht se prej vitesh nuk janë luftë emigrojnë sepse detyrohen nga vjedhjet që u bën qeveria.
“Duke parë këtë tablo tmerri, kur shqiptarët janë të lirë për të lëvizur në Europë, vijnë nga një vend anëtar i NATO-s, kanë një pozicion gjeografik dhe klimë të mrekullueshme, nuk rrezikohen nga konflikte, sëmundje apo uria në shkallë të gjerë, atëherë përse rrezikojnë më shumë se bijtë e këtyre vendeve të sfilitura?
Përgjigja është: duke qenë europianë, duke i njohur dhe përqafuar parimet europiane të garës së ndershme, mundësive të barabarta, shtetit social, solidaritetit etj., dhe duke mos i parë të materializuara dhe të mundshme këto mundësi në atdheun e tyre, shqiptarët largohen. Duke parë se qeveria manipulon votat, vjedh me inceneratorët dhe fondet e BE, nuk ofron siguri jete për qytetarët, promovon elementët kriminalë në shoqëri, nuk ka prioritet arsimin dhe as shëndetësinë, shqiptari detyrohet të marrë rrugët e botës”, tha Këlliçi.
Duke u ndalur tek të dhënat e raportit britanik, Këlliçi shprehet se vendet e “tmerrit” si Irani, Afganistani, Iraku, Siria dhe Eritrea prodhojnë më pak emigrantë se Shqipëria.
“Sipas raportit britanik, ndër ata që e kanë kaluar Kanalin Anglez, në një periudhë 6 javore, 13 përqind janë iranianë, 12 përqind afganë, 7 përqind irakenë, ndërsa me 5 përqind janë sirianët dhe eritreasit. Kreun e tabelës e kapin shqiptarët me 40 përqind.”-deklaroi ai.
Discussion about this post