Zëdhënësi i BE-së për Politikë dhe Siguri të Jashtme, Peter Stano, ka folur pas vendosjes të reciprocitetit për targat nga qeveria e Kosovës.
Në një konferencë për mediat, ai tha se duhet të ndalen tensionet dhe të promovohet lëvizja e lirë, ndërsa bëri thirrje për vijimin e dialogut.
“Ne po ndjekim nga afër situatën. Lëvizja e lirë është një nga themelet e Bashkimit Europian dhe ne inkurajojmë Kosovën dhe Serbinë që të promovojnë lëvizjen e lirë. Ne i bëjmë thirrje të dyja palëve që të frenohen menjëherë nga akte unilaterale dhe të reduktojnë tensionet. Ne i bëjmë thirrje palëve që të shfrytëzojë dialogun që të trajtojnë të gjitha çështjet e hapura që kanë midis tyre, duke përfshirë këtu lëvizjen e lirë dhe çështjen e njohjes së targave të makinave”.
Stano tha gjithashtu se Miroslav Lajçak është në Beograd dhe do të takohet me presidentin e Serbisë, për zgjidhjen e çështjes, ndërsa ka qëndruar gjithashtu në kontakt me autoritetet e Kosovës për zgjidhjen e çështjes.
“Aktualisht, përfaqësuesi i posaçëm i BE-së për dialogun, Miroslav Lajçak është në Beograd dhe do të takohet me presidentin e Serbisë, Aleksandër Vuçic për zgjidhjen e çështjes. Ai gjithashtu ka qëndruar në kontakt me autoritetet e Kosovës për zgjidhjen e çështjes. Qëllimi i Bashkimit Europian është krijimi i kushteve për pajtimin dhe stabilitetin në rajon, nga të cilat përfitojnë qytetarët e rajonit”, tha Stano.
Më herët në mëngjes, qeveria e Kosovës, njoftoi se të gjitha automjetet që mbajnë targa të Serbisë dhe hyjnë në Kosovë, duhet të pajisen me targa të përkohshme, që sipas këtij vendimi mund të bëhet në të gjitha pikat kufitare të Kosovës.
Targat duhet të vendosen në vende të dukshme dhe për vendosjen e tyre do të ketë një pagesë prej 5 eurosh, ndërsa shkruhet gjithashtu se vlefshmëria e targave zgjat 60 ditë.
