Ministri për Komunitete dhe Kthim i Kosovës, Goran Rakiç ishte sot i pranishëm në pikën kufitare të Jarinjës ku serbët kanë lënë automjetet në rrugë duke protestuar pas vendimit për reciprocitetin e targave.
Rakiç, i rrethuar nga protestuesit serbë ka thënë se është reaksion dhe jo aksion vendimi i qeverisë së Kosovës për të mos lejuar asnjë automjet që niset nga Serbia të kalojë në pikat kufitare pa u pajisur me targat e përkohshme.
Nga Jarinja, ai është shprehur se është në kontakt me Beogradin lidhur me vendimin, dhe se ka tentuar gjithashtu të flasë me të dërguarin e BE për dialogun Kosovë-Serbi, Miroslav Lajçakun, por nuk ka mundur.
“Bisedimet nuk janë tavolinë suedeze të marrësh atë çka të pëlqen. Ky nuk është aksion. Ky është reaksion. Populli është i frikësuar. Kam tentuar të flas me Lajçakun por s’kemi marrë përgjigje. Jemi në kontakt me Beogradin”, tha Rakiç.
Më herët në mëngjes, qeveria e Kosovës, njoftoi se të gjitha automjetet që mbajnë targa të Serbisë dhe hyjnë në Kosovë, duhet të pajisen me targa të përkohshme, që sipas këtij vendimi mund të bëhet në të gjitha pikat kufitare të Kosovës.
Targat duhet të vendosen në vende të dukshme dhe për vendosjen e tyre do të ketë një pagesë prej 5 eurosh, ndërsa shkruhet gjithashtu se vlefshmëria e targave zgjat 60 ditë.
