Ekipet e kërkim-shpëtimit në Bulqizë kanë raportuar pak minuta më parë se, kërkimet për minatorin Muharrem Plaku të bllokuar brenda prej 5 ditësh janë kthyer në pikën zero. Kjo, për shkak se në galerinë ku ai është bllokuar, janë regjistruar të tjera shembje.
Mësohet se gjatë natës së kaluar, për shkak të shirave të dendur, ka pasur një tjetër shembje masive 450 metra thellësi në minierën ku dyshohet se është bllokuar 60-vjeçari.
Muharrem Plaku ndodhet brenda galerisë së minierës në Bulqizë që nga mesdita e 15 shtatorit. Ekipet e kërkim-shpëtimit kanë nisur punën prej ditësh, por publikisht kanë deklaruar se terreni është mjaft i vështirë dhe se vijojnë të bien minerale.
Ata kanë shtuar se po vijojnë të punojnë me ritme të ngadalta në mënyrë që të mos rrezikojnë shembje të tjera më të mëdha që do të shuanin shpresat për nxjerrjen gjallë të minatorit. Familja e Plakut pret në ankth prej ditësh dhe pse gjasat që të takohen me 60-vjeçarin janë të pakta.
E.H
