Trajneri i Kombëtares, Edi Reja ka komplimentuar lojtarët pas fitores me Andorrën dhe rekordin e 18 pikëve të grumbulluara në këto kualifikuese. Italiani u ndal tek fushata e kualifikueseve, të ardhmen e tij dhe përgatitjet për kualifikueset e kampionatit europian.
“Përgjigjet ishin pozitive sa i përket pjesës së parë. Krijuam shumë raste, por dukej sikur porta ishte e magjepsur, komplimente djemve, arritëm objektivin me 18 pikë si vend i tretë.
Na vjen keq për ndeshjet me Poloninë, mund të shkonim në ‘play-off’. E kisha shumë frikë këtë ndeshje, pasi mbërritëm në fund të eliminatoreve me shumë probleme, dukej sikur na kishin mallkuar, por urime të gjithë djemve.
Kam edhe një vit kontratë, jam i impenjuar dhe në dispozicion, por të shohim përpara, pasi e ardhmja ime varet edhe nga Federata.
Kemi bërë gjëra të shkëlqyera, kemi aktivizuar 45-46 lojtarë, jemi gjithmonë në kërkim të lojtarëve të rinj, Federata më ka kërkuar rinovimin e grupit të lojtarëve.
Kemi bërë një punë shumë të mirë edhe për të ardhmen, pasi detyra ime ka qenë të përgatitemi për Euro 2024. Kemi bërë gjëra të mëdha në kuadrin e dy viteve, kemi aktivizuar shumë lojtarë të rinj.
Nëse do të jem do të vazhdojmë përpara, nëse nuk do të jem mund të them se tavolinën e kemi plot. Kemi marrë kritika pas humbjes në Angli, ndërsa sot ishte e vështirë.
Fituam, tani kemi 18 pikë. Më vjen mirë që dikush kujtohet për rekordin e pikëve. Hungaria fitoi sot në Poloni, pra tregoi se nuk është ekip aq i lodhur.
Luajtëm mirë sot, patëm shumë mundësi, por për fat të keq nuk tundëm rrjetën. Nuk duhet të kemi pengje, e bëmë rrugëtimin tonë, komplimente djemve, pasi sot luajtëm edhe pa tifozë.
Kemi qenë pa fat në periudhën e fundit, dikush aty lart nuk na ndihmoi, kështu që duhet të kënaqemi me kaq. Duhet të reduktojmë grupin për fushatën eliminatore të Europianit”, tha Reja.
Discussion about this post