Një ngjarje e rëndë ka ndodhur në Golem në mesin e sezonit turistik, ku 5 turistë turq janë dhunuar nga stafi i Diamma Resort. Sipas burimeve, turistët kanë qenë duke konsumuar ushqim dhe pije në ambientet e lokalit, kur mes tyre dhe personelit ka nisur një debat, pasi punonjësit u kanë kërkuar të mos bëjnë zhurmë. Sherri ka degraduar deri në dhunë fizike dhe përdorimin e sendeve të forta.
Fillimisht, ka qenë menaxheri i resortit David Kondo dhe një punonjës i plazhit Eluert Qose që me sende të forta kanë dhunuar fillimisht dy prej turistëve turq. Të dy janë vënë në pranga dhe akuzohen për “Plagosja e rendë me dashje”, kryer në bashkëpunim, dhe “Prishja e qetësisë publike”,
Ndërkohë ka nisur hetimi në gjendje të lirë për dy punonjës të tjerë, banakieri dhe punonjës i sigurisë, të cilët kanë goditur dhe kanë kanosur 3 turistët e tjerë turq. Ata akuzohen për “Plagosja e lehtë me dashje”, kryer në bashkëpunim, dhe “Kanosja”.
Burime bëjnë me dije se turqit kanë marrë dëmtime të lehta dhe pasi kanë marrë ndihmë mjeksore janë larguar nga ambientet e spitalit.
Diamma Resort ku ka ndodhur ngjarja është një resort me 5 yje në zonën e Golemit dhe rezulton në pronësi të Edmond Luadhit.
Njoftimi i policisë
U konfliktuan fizikisht dhe me sende të forta, me 5 pushues turq, arrestohen 2 shtetas dhe procedohen penalisht 2 të tjerë (punonjës në subjektin ku ndodhi konflikti). Menjëherë pas njoftimit për një konflikt ndërmjet disa shtetasve, në një lokal në plazh, në Golem, shërbimet e Stacionit të Policisë Plazh organizuan punën dhe shkuan në vendngjarje, me qëllim identifikimin dhe nxjerrjen përpara përgjegjësisë penale, të shtetasve përgjegjës. Në vijim të veprimeve procedurale për rastin:
-u arrestuan në flagrancë shtetasit D. K., 33 vjeç dhe E. Q., 37 vjeç, të dy banues në Durrës, përkatësisht menaxher dhe punonjës në hapësirën e plazhit në këtë subjekt, për veprat penale “Plagosja e rendë me dashje”, kryer në bashkëpunim, dhe “Prishja e qetësisë publike”, pasi dyshohet se gjatë konfliktit për motive të dobëta, kanë goditur me sende të forta, 2 pushues turq;
-u referuan materialet në Prokurori, ku nisi procedimi në gjendje të lirë, për veprat penale “Plagosja e lehtë me dashje”, kryer në bashkëpunim, dhe “Kanosja”, për shtetasit I. Sh., 48 vjeç dhe T. D., 49 vjeç, përkatësisht banakier dhe punonjës sigurie në këtë subjekt, pas dyshohet se kanë goditur dhe kanosur 3 shtetas turq.
Materialet procedurale iu referuan Prokurorisë së Durrësit, për veprime të mëtejshme.
Discussion about this post